خلااااااص ..للشاعرة / هناء نوار

و بتنهّد ….
و تطلع ويا تنهيدتى
أصوات بتشبه للنحيب
زى ما تكون القيامة .. قرّبت
و عيال بتصرخ جوا منى
من الوجع
مستنيين لحظة دفا
مليون فراغ ..
فاردين جناحهم ع الملأ
و المبتدأ …
ما بقاش بينصب فِ الخبر
و المختبر …
قابل خلاص للاشتعال
أنا من زمان ..
و انا نفسي فِ العشق الحلال
بس الظروف حكمت عليا
أكون أنا .. أكون هِنا
مش ذنبي إنى بقيت كدا
مشاعرى ماتت من سنين
جدران حياتى مشققة
مالهاش أساس
مانا أصلي موجودة و خلاص
هو احنا أصلا جينا ليه
فِ دنيا فاجرة ما تختشيش
تفتكروا نستاهل نعيش
أصل إحنا كلنا كدابين
و ممثلين
و خايبانين
طب إيه بقا ؟؟
حاتعلقولنا المشنقة
طب يالا بينا نندفن
مستغربين ..
و إيه الغريب بس ف كدا
ماهو احنا أصلا مدفونين
و زى ما تقول : بالحَيا
فين الخِشا و فين الحَيا
نِفسك تعيش ؟؟
طب قولّى ليه ..
هى الحياه عاد فيها إيه
يستاهل انك تعشقه
طب هاتلى واحد بس
ممكن أصدقه
أستغفر الله العظيم
قربنا نكفر م الزهق
خد الورود مابقاش حنين
زى زمان
و بقينا ف حالة هيجان
الكل صبح عنده جنان
اللى سليم مش راضي بحالُه
و اللى معاه المال تعبان
ورق البفرة بقا بملاليم
و المساطيل زهقوا من الصنف
حتى الكيف ما بقاش بيكيّف
و اللى مشتّى نفسُه يصيّف
و المتجوز عاوز يتنفس حرية
طب فين هيا ..
مانت من الأول غلطان
مسكين والله يادى الانسان
أف زهقت
مش من حقك تفتح بقك
و لا تتكلم
إسكت خالص ..
بس خلاص !!