خاص بالمسابقة
جابر طلبه جادالله _ مصر
شعر عامية
خمستاشر جنيه مصرى
وكان وياه خمستاشر جنية مصرى
مخبيهم من الايام
عشان يمكن تجيلوا ظروف
عاينهم تحت مرتبته
وكان خايف عليهم خوف
مكنشى يخاف على فلوسه
لكن كان حلمه طول عمره
يعيش مستور
وقال وقت أما أكون محتاج
هيحمونى من الحوجه
مع أنه
فى عمره كله كان محتاج
ساعات ياما يكون ملهوف على سيجارة بنص جنية
ع كوباية عصير مانجه
لكنه كان بيستخسر فى نفسه كتير
ماكنش بخيل
لكنه كان ماليه الخوف من الأيام وقسوتها
ويارتها .. ويارتها
سابت قلبه حزين وخلاص
ياريت كان عاش
تعالوا ياسادة ياسامعين
هقص عليكم القصه
من الأول إلى الأخر
وصلوا ع النبى المختار
عشان محتار
هبدأ الحكايه منين
من المستشفى الميرى
لمستشفى جيهان العام
بتجرى أمه مقهوره
وشايله بين ضلوعها ألام
تعدى شهور
سفر أيام
ولا واحد بيرحمهم
ولا واحد يقول دا حرام
عشان الفقر مصاحبهم
وفى بلادى بتدخل أى مستشفى
سؤالهم أنت تدفع كام
معاكشى ؟
يبقا مش لازم تعيش أصلا
وماتبرطمش كتر كلام
هيبقا معاه دا بس إزاى
وراتبه من حكومتكم
مابيكفيش لنص الشهر
دا كل يوم يعدي عليه ياعينى بقهر
وراضى بعيشته وقليله
لكن تبقا حياة أمه جزاته ومهر
عشان رافض يكون منكم
مفيش عايش هنا غيركم
وليهم صوت وليهم دهر
لكن أحنا نموت عادى
ودى بلادى
من المستشفى الميرى
لمستشفى جيهان العام
ألام فى ألام
ويعمل أيه بقا المسكين
وهو يادوب محوش تحت مرتبته
خمستاشر جنية مصرى
جابر طلبه
01287420916
