عبيتلك القمر
ف قصيده كتبتها
والشمس رسمتها
ضحكه على سنتك
غرقان انا والقمر
والشمس برسمها
ف عيون ضحكة شفايفك
وف حضن محبتك
اتشعلقت ف شعاع
وطلعت استسمحك
تلينى وتعطفى
وتيجى عندنا
تعبت من البعاد
مش طايل مطرحك
ولا قادر تبعدى
ابدا عن حينا
يانجمه ف طلتك
وبسمه ف رقتك
انا عاشق بسمتك
ياضى من السما
غرقت ف نظرتك
وتهت ف سكتك
وعاشق دنيتك
ياروح متبسمه
ساكنه جنب النجوم
ومفيش هناك هموم
مش قادر انسى يوم
حلاوة ضحكتك
باتمنى والمنى
معشش ف الغنا
ومفيش مكان هنا
الا لمحبتك
