دوّر عليّا جوة نفسك ..
حا تلاقينى
دوّر و يمكن تفتكر ..
ياللى ناسينى
منا اللى ياما نسيت معاك
عمرى و زمانى
و تهت منى و سبتنى
واقفة فِ مكانى
دوّر على الحلم اللى ضاع
و افتكر مين اشترى
و مين اللى باع
إفتكر مين اتظلم
و مين ظلم
و مين اللى سبّب للى حَبُه
دا الألم
كل الحاجات الحلوة
ليه فرّطت فيها ؟
و ليه مشاعرى الصادقة عندك
مش لاقيها ؟
ليه وعدت .. و ليه خلفت ؟
ليه حلفت انك عِشقت ؟
لما انت ناوى ع الفراق ..
كنت قوللى من البداية
كنت حبعد قلبي عنك ..
و تنتهى كل الحكاية
عيشتنى فِ الوهم ليه
و لعبت بيا ؟
جرحتنى ..
و جرحك مازال بيهد فيا
غلطتنى انى اديت أمان
من غير حدود
صدقت إنك
مش حتخلف يوم وعود
لكن يا ألف خسارة
ع الحب اللى كان
و مِيت خسارة
لما تبكى ع اللى خان
داللى يخون مرة ..
عمرك ما تِلقى معاه فِ يوم
بر الأمان !
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
