رسالة اليوم . مسابقة الشعر العاى بقلم / نادية محرم الجميعى .مصر

((رسالة اليوم)) مسابقة شعر العامية
بقلم / نادية محرم الجميعي…! مصر
………
أبى الفاضل مازال بين الرسايل لوم
مليت الدرج بالأوراق ،
وبهرب م الحروف وأمسك فـِ حرف ال باء
أقول بابا ، يرد القلب انا بشتاق لتفاصيلك ،
رسايلى بتوصلك طبعآ …
ولا بتوصلنى مراسيلك ،
غلبنى النوم لقتنى بَسيبنى وبجيلك..
داعيلك قلبى فـ الصلوات ،
تحياتى يا ضى بشوفه فـ السموات
حقيقى الأب ده هيبه ، وطيبة وضهر
عيونى بتبكى بَعدك “قَهر” ،
بقالك شهر واكتر ناسي ليه تجينى !
وتدخل أوضتى نُص الليل تغطينى..
نِشف طينى وماتت بذرة الأحلام ،
ما تيجى/ وقول هتيجى بكام وانا ادفع عمرى لحظة بلحظة واستناك ..
ياتستنى يا إما خلاص تاخدنى معاك ..
وأقول لـ اخواتى روحى اليوم بقت يمى ..
واقول لـ امى انها وحشاك ،
ها احَضَّر شايك المظبوط واجهز بدلتك وعشاك..
هموت عايشاك .. هعيش عايزاك يا أجمل أب
يا أغلى حبيب ، يا أول حب
أقولك سِر .. يا بابا “بَحب”
وخايفة ما اشوفش فيه “إنت” …
وياخد منى روحى البِكر
ويقسم قلبي 100 حتة ..
واكون شماعة شايلة الحزن فـ جاكتة ،
وماما خلاص بقت أضعف من الأول ..
جميع الخلق للأوحش بتتحول ،
خواتى الدنيا وخداهم ،..
غيابك بس ليه طول ؟!!
حاجات بعدك بتتغير مهش صالحة ،
حاجات كات بين إيديك سُكَر ، سابتها ايديك بقت مالحة ..
وطعم الضحكة مش مرغوب ، ولما اضحك مراضية .تجيب الضحكة 100 قُرحة ..
وصعب اشرح ومش شارحة ،
أظن الحالة ليك ياطبيبى اهى واضحة…
تقيل حِملى على اكتافى …
تعالى اشهد على زفافى ، ولبس بنتك الطرحة
تعالى وكَمّل الفَرحَة وطمنى ..
بقيت بَعدك بخاف م الناس ، بخاااف منى
أبى اللى انا مت من دونه ،،
أنا البنت اللى مهما اكبر .. بكون فـ عيونك النونو
بشوف الدنيا أجمل دنيا لما ببص فـ عيونه 🙁
محدش فاهم القلب اللى ربيته ..
ومين غير اللى ربّا قلبي هيصونه !!
بقيت فَصلة فى وسط كلام ،
وألف علامة استفهام …
بقيت من بعد موتك كل لحظة بنام ..
عشان فـ الحلم بتزورنى ..
أنا حبيت صحيح لكن ، أخاف الحب يكسرنى
بيعصرنى الحنين والضهر بقا محنى ..
وبمسح دمعتى م الخوف لـ تلمحنى ،
سامحنى ان خدت من ريحتك ،
ونزلت دمعتى بالغصب ،
أنا أهملت فـ نصيحتك …
وكان الضحك نَصب × نَصب ..
أنا لا خسرت مال ولا جاه ،
خسرت الكون بدونك أب ،
خسرت الصاحب الأوفى ..
أنا عارفة انى زعلتك وبايت م الكلام مهموم ..
لأن بتختلف جدآ رسالتى اليوم ..
هقوم الوقتى اجيب الظرف …
وابسطر كل جواباتى ..
هيفضل بس ناقص حرف من ذاتى ..
رفض يكتبنى ماضى فـ خانة الآتى ..
حياتى مفيش ، يا اموت يا تعيش
يا تزرع ريش فـ دراعينى ..
ياتفتح شيش فى دِرا عينى ..
يا تحضنى تدارينى ورا قبرك …
ياصبرك …. ياصبرك ع البعاد والوقت من غيرى ..
وعدتك إنى اكون جنبك منين ماتروح ،
وغصبن عنى تأخيرى …
مجاش لسه الأوان لكنى بستنى ..
متوصفليش هتبقى ازاى ،
أكيد يعنى هتحلى بروحك الجنة ..
بقالك قد ايه غايب ، ؟!!
ماخَلَعِتْلِيش إيديك سِنّه …
هشاشة فـ كل تفاصيلي ..
بدارى الشَعر لابيض لسه بالحِنة …
بَشيب من جوه قبل البَرة ما يعجز ..
وبَكْرَه عقلى لو ركز ..
يامتعزز واحشنى ماتيجى يلا الوقت ..
ياسايبنى كأنك ماشى وما صدقت 🙁
بدأت ادبل / وكُنت الرَى ،
ياماشي حلفت منتش جَى ..
ماتخلف مرة وعدك ليا انا حنيت ..
واحشنى …
وزى ما واحشنى وحشت البيت