رسالة من الغربة,مسابقة الشعر العامى,بقلم/صابر فرج ياسين على .مصر

مسابقة الشعر العامي
الأسم صابر فرج ياسين على ( جمهورية مصر العربية )
{ 01117311278 }
( [email protected] (
قصيدة { رسالة من الغربة }
*******************
رسالة من الغربة
***********************
وبَكتبلك من الغربة
وبحكيلك .. والحياة صعبة
وبَوصَفلك .. دنيا غريبة مكتئبة
وعن حالي لمّا بشتاقلك
وعن شوقي لحنين صدرك
وعن سجدة على أرضك
وأنا رافع في السما راسي
ودمع عيوني يملاني
لمّا بيذكروا إسمك
***********
وبكتبلك ..
فِ صُبح يطُل على عيني
وشمس هواكي يا حبيبتي تدفيني
ولُقمة ويّا حبة شاي تقضيني
وعن عمي لمّا يندهني يواسيني
ما شفتش زي عشقك عشق
لا يوم فرقتي إيه لوني
ولا فتشتى عن ديني
********
وبرّسِملك ..
صورة لجامع العُشاق
لنِيلك لمّا يحُضُنهم .. كَمَاَ المُشتاق
سلاماً على نيلك كَلما يَجري
سلاماً على ماءاً كما الترياق
************

وبحكيلك ..
عن الصحبة اللي وحشاني
عن ضحكة .. لسة صداها في وداني
وعن صاحبي اللي خلاني
بكيته لمّا فارقني وخلاني
قلت يا موت ليه تاخده وتنساني
ياريت يا صاحبي ترجعلي ..
ونتجمع هنا تاني …
***************
وعن شوقي …
لنومة ف قلب حِجر أمُي
ماهي الحب وهي بالدفا أمي
عن اخويا وعن اختي
ومين غيرهم يحملوا همي
ولا يحلي معايا الحال
إلا أما أفتكر أمي
*********************
وعن حلوة .. عندك يامه تاركها
عن شوقي .. لفرحي وحزني أشاركها
وإيدها لمّا بتطبطب وبدعيلها
يزول همي .. بنظره واحدة في عيونها
… وعن ولدي راح احكيلك
بكل شقاوته بفتكره وبدعيلك
مين إتحمل .. مين إداني الحنان غِيرِك
واحشني ياولدي .. بموت والله من غيرك
*************
وإمتي ..
يا عُمري أرجعلِك وأتكلم
وأضم تراب أرضك وأتيمم
لعنت العوزة علشانك
مانيش قادر على بعادك
خلاص قلبي م الوجع سلم
خلاص راجع وأصعب درس بتعلم
بعادك يا حبيبة القلب جرّحني
وخلّيَ وريدي يبكي الدم .. يتألم …
**********************