“رساله الى أمى” ***********
بسم الكريم ابتدى
واخط مرسالـــى
وبذكـــر طه النبى
الحرف يحلى لى
بعد التحيه سلام
مــــوصول بوصالى
أمى حبيبة الروح
مـــن ابنك الغالى
وحشانى يا امه كتير
وتملى على بالى
عاجز عــن التعبير
والحكي عن حالى
مشتاق وكلي حنين
لجبينك العالـــى
ف البعد انا مسكين
ولا شىء بيهنى لى
حتى ف عز النوم
بتجينى فـــ خيالى
بحلم انا بيكــــى
دايماً وطــــــوالى
ميتـــى انا اجيكى
والاقيكى واقفه لى
تاخدينى بالأحضان
وايديكى مــاده لى
تبوسينى ف الخدين
يمينى وشمالى
وافكرك بزمــــــــان
بيتنا وبيت خالــى
كنــــــا يا أمى اتنين
و القلب كان خــالى
كنت امـــا اجي انام
تقــوليلى تعالى لى
على رجلي نام وارتاح
هافرد عليك شالى
يسرق عينيا النـــوم
وتباتى صـــاحيه لى
وقبل ما اقول الأه
قلبك يقـــــــولهالى
وحشانى يامة كتير
دايمــــا على بالى
واخر جوابى سلام
يا كل مــــــوالـــى
*********** قلم/حلمى قاسم
