روّق صح صح ..قصيدة للشاعرة / نبيلة محمود

أضحك كركر ليه تتعكر التكشيرة ح تعمل ايه

خطط فكر اسأل أكتر شوف لك حد فضفض ليه

متخليش حد يقول لك شايل طاجن ستك ليه

أوعى تعيش أبدا متكدر كل شيء ف حياتنا مقدّر

رب الكون عالم بيه

الفرح اتمناه تلاقيه … الجرح انساه ولا تلمس فيه

والحب إن تاه دور انت يا عم عليه

أوعى تعبّر حد عليك دايما يتكبر ولا حتى بإشارة تحييه

عيش متفائل خليك عاقل إن كلمة اتقالت عديها … ..

فى ناس ما تلموش عليها ولا تحتار ازاى تراضيها

الأيام بكرة تربيها …. ح تزعل روحك على ايه !!

خليك رايق ولا تضايق … ألبس ..أخرج يالا اتعايق ….

روّق نفسك حتى دقايق .. وساعد محتاج حن عليه

عيش متهنى أفرح غنى واللى يضايقك سك عليه

وحياتك مش واقفه عليه ولا رزقك ممسوك بأديه ….

متخليش حد يقول لك شايل طاجن ستك ليه !!