…………………..
كنت باسأل نفسي دايما
يعني أيه كلمة باخاف
ويعني أيه كل حروبي
يبقى آخرها الهتاف
ويعنى أيه أرجوز بيرقص
والبشر حواليه لِفاف
كنت باسأل عن طيور هجرت روابي
عن حكاوى الليل وآخره وهو راجع بالعواف
كنت باسأل نفسي دايما ليه مانرضي بالكفاف
ليه بنبكي ع اللى كان والعيون فيها رواح
كنت باسأل ياسفنتي عن شطوطي
عن نجوم الليل وراجعه بالبراح
كنت باسأل ليه حياتي فيها عايش للجراح
وليه طيور الليل بتضحك وليه غُنايا بالنواح
كنت باسأل يا يلادي وجوا نفسي كتير ملام
نفسي أصرخ نفسي انادي ع الكلام
نفسي انادى ع الجناين نفسي انادى ع الآمال
كنت باسأل نفسي دايما ليه مانرجع بالزمان
للطيابة والسماحة والحنان وسط الأمان
كنت باسأل نفسي دايما يعني أيه كلمة هوان
يعنى أيه الشمس غايمه والعروبه بالكلام
كنت باسأل بس ألاقى سؤالى راجع مِت سؤال
والإجابه لسه عاصيه .. رافضه بوحها للسان
…………………………………………………..
كلمات / أيمن صبري أبوعماد
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
