محمود شعبان نعمة الله
مصر
01281873085
مسابقه ’’ شعر العاميه ’’
سالب سته ,,
ف الأول كنا بنتقابل !!!
من غير ما نحدد أى معاد
من أول صاحبى اللى عرفته
تقريبا كنا ف حفل ميلاد !!
و مروراً بأخويا و جِدّى ,,
و مروراً أيضاً بالأستاذ
و جدير بالذكر ان انا بنسى
مع ذلك فاكر إسمه معاذ !!
و لحدّ حبيبتى اللى أساساً ,,
حبيتها عشان مابتخنقنيش
وأخيراً .. الست الوالده ,,
و دى أصلاً أول واحده تعيش !!
ف الأول صاحبى دا كان جنبى
كان زى الضل ما بيفارق
لو يزعل منى ما بيخبّى
لو أزعل منه ما نتفارق !!
و أخويا دا أصلاً كان مِنِّى
هات لقمه واقسم ع الاتنين
كان أكتر بنك يمولنى ,,
مع انه موظف ف التأمين !!
أنا جدى دا شىء استثنائى
كان صوت العقل اللى ف بيتنا !!
كان يدفع ويجيب بالباقى
حواديت عن روعة لمّتنا ,,
أستاذى برغم انه ضربنى .
على أول واجب ماعملتوش
مع ذلك علِّم اوى فيّا ,,
علّمنى ازاى ماصنعش وشوش ..
وحبيبتى دى أول من يعلم !!
كالعاده وتعرف أسرارى ..
و دى كانت أيضاً من أول ..
مَن يقرا أساساً أشعارى ,,
الست الوالده بتدعيلى !!
يفتحها ف وشّك يابنى و روح
وانا اردّ واقول ما تعلّى الصوت
علشان كان صوتها كتير مبحوح !!
السته ف عز ما كانوا عُزاز ,,
خدوا اول رحله وفارقونى !!
وما سابوا لـ قلبى غير الألغاز
لو تقدر قول بيعاقبونى ,,,
من أول صاحبى اللى نسانى
مع إنّى احتاجت أكون ويّاه
وانا كل ما بسأل من تانى !!!
الناس بتقولّى ياريت تنساه
و أخويا دا بعد ما جوّزنى ,,,
أصبحنا كإن اتنين أغراب
و دا نادر جداً لو زارنى
مع إنّ الباب دا ف وش الباب !!
أنا جدّى اتوفّى ومن مده ,,
واتوَفِت أيضاً حواديته ..
وماسابش ف بيتنا غير الطيبه
واهى نفعت جداً تربيته !!!
أستاذى الطيب أنا آسف ,,
على أول ضحكة سخريّه
على آخر حصه حضرناها
و عملنا الحفله المؤذيّه ,,
يا حبيبتى انا قولت و 100 مرّه
مش قد الوعد اللى أخدته !!!
والأغرب برده انتى مُصِرَّه ,,
وانا اقولِّك حُبِّك مش وقته ..
الست الخاليه من الأخطاء !!
السبب الأول ف نجاحى
موجوع ف غيابِك .. و يا أمى !!
ف رعاية ربِّك إرتاحى ,,
السته سابونى ودلوقتى ,,
أنا أضعف واحد ف الحتّه ..
م الآخر أصلاً ف غيابهم ..
لو تقدر قول ,, سالب ستّه .
#سالب_سته
#محمود_نعمةالله
