سجال رائع بين هلوسات رحم الخيال (م / أحمد صلاح ) وبين رباعيات مريومه الشاعرة ( مريم النقادى
سجال #رائع_ بين هلوسات رحم الخيال (م / أحمد صلاح ) وبين رباعيات مريومه
(مريم النقادى )
___________________________________________________
#مريومه
وشــدّ الحرف من سحِره و شـــدّ الحرف
ومــد الخـــط فى سيرته ليــــــالى ألـف
فضلت أتبسّـم وأرسم ورد على سطــره
جميع ما يكتب مُصرّح ومسموح م الصرف
#رحم_الخيال
وشِدّ الخوف من توبه وشِدّ وفُوق
ومِدّ الحبّ في سيرته بحور من شوق
وعَلّْي الصوت وغنواتك عَلّي لفوق
دا كل ليل وفــ نهايته صباح وشروق
#هى
وشدّ الحرف خيال مولود من فجر
وفك طلاسم القلب وشال الصبر
وحرر حرف يتواصل فـ قلب نداه
أقول الله على فنـه فـ كُل سطر
#هو
وشدّ الضي من حرفي بطعم الزهر
وصحّي فرح من جوفي بيرقد دهر
دا كلّ الكون غنوايه على كفوفي
وكلّ قصيدة من شوقي بترسم بحر
#هى
وشدّ زمانى ووقف لى خط العمر
وزاد ع اللحظه بسمايه وبركان عطر
و قلبـــه سبانى وخدنى سجيــن
وفـ سجنه أنا رافض أكون فيه حُر !
#هو
وشدّ وداني من راسي وقالّي سر
أنا الغرقان وفي عيونك شطوطي وبـرّ
دا حبّك روح بتسكنّي في برد وحـرّ
وحبّ الغير ولا بينفع ولا بيضرّ
#هى
وشدّ إيديا وخطفنى من نفسى والإحزان
وزاد فرحى وزال جرحى بين الأحضان
يا عاشق الحرف الأبيض فى عقد الفل
أنا ملضوم على صدرك وشوقى خيطان
#هو
وشدّ حروفه من شاشتي وقالّي النت
قلت خلاص يا مريومه تعبت وخفت
دا حرفـــــــــــــك عالي ودا طبعه
وانا مسكين على طبعي هاودت ولِنت
#هى
وشدّ الحرف من إسمه ولاأعرفه ايه
وقالى الشد فى حرفِك واخدنى إليه
وساحر فى الخيال شاعر مالوش زى
حروفى هنــــــا لاتكفى كتابه فيه
#هو
وشدّ كسوفي من قلبي وعشقي بان
وبدّل دنيتي وحيرتي حنين وأمان
يا زارع الورده في أرض القــــلب
أنا الراوي واحضانك هيَ البستان
#هى
وشدّ العين فى كل مرة تشوفه
وتسرح فى خيال نسجته حروفه
وبين الحرف والشاعر تاهت ملايين
وقلبى لما ندا إتدارى فى كسوفه
#هو
وشدّ عليا في مدحه وخفت عليه
وقولت له كفايه كلام وبوست ايديه
وأنا وصوتي ولا مرّه صعبنا عليه
واخرتها بعت له عيون مني تحب عنيه
#هى
وشدّ عليا وشدّد سكوته كلام
وفاق الحد فى حبه أحلى غرام
وكل نظرة يزيد حبه بالأضعاف
توهنى ف شارع صمته كأنه زحام
#هو
وشد عنيه من عيني وهذّبها
وشالْ تنهيده من قلبه وهدهدها
وقال لكلامه بكفايه حنين وجنون
طريقة شعر دي ولّا طريق بيتها
#هى
وشد الكلمه من طرف لسانى
وقال أحبِّك وأنتى كمان حبّانى
وجمّعنا خيال الحرف والمعنى
كُلك أنا وأنا فيكى وطن تانى
#هو
وشد طيفه وقال شمسك بتهواني
وطن انتي وانا منك وطن تاني
يا كل الحب يا رحله على جناحي
يا ضحكايه وغنوايه وفرشاتى وألواني ..
#هى
وشدّ الوتر وضبّط نغماته
وقال موال كنت أنا آهاته
كنا إتنين كلمه ولحــن
بقينا قلب بتتعشق دقاته
#هو
وشدّ العود ورتّب الكلمات
وقال موال بيرقصلي بلا نغمات
وكنا اتنين وتالتنا بحور الشعر
بقينا قلب تغريدُه مع النجمات
#هى
وشدّ الحال وقام يمشى يودعنى
وليه رحال ودقة قلبك بتسمعنى
أنا لك بيت وحضن وغيط وكام نجمه
وأنت دفايا وضل حكايه بتجمعنى
#هو
وشد رحاله من غصنه ومــ الاحلام
هديل صوته وموهبته كأنه حمام
لكن اسمه على رسمه مجننها
بيشعر يوم ويوم علي جفن الورود بينام
وقولنا ســــــــــــــــــــــلام —
