للأشتراك فى المسابقه ــ الشعر العامى
ـ تُقرأ بالهجه الصعيدى ـ
:: سعدون ::
سعدون ده واد عسّوله فى عمر ست سنين
دخل يادوب سنه أولى وغمازّته ع الخدين
ف يوم دخل الدار (لجانا )مجتمعـــــين
وصريخنا زى النار راح منا راجل زين
أبوه صابوه غدر (مجتــول ) برصاصتين
والشاب كان بدر (والخلج) فيه شاهدين
وأنا كيف الدهشانه وأخبُط ع الكفين
ودارنا سوق مليـانه وحواليا مسئولين
فى الدفتر سألونى مين اللى (جتله )مين
بكيت بدمع عيونى واعْرِف (الحج) منّين
عسكر ولا فلول ولا جماعه باسم الدين
كيف يكون (مجتول ) على يد مصريين ؟؟
(لجيت)سعدون عم يبكى أبويا راح فين
والكل واقف يشكى طاره ف (رجبه) مين
ضميت سعدون لحضنى وحويته بدمع العين
اسمع يا ولدى منى لساها باقيه سنين
صحيح الهم شيله واليُتم أكبر شين
لكن بلــــدك عيّله و إخواتك مظلومين
هتعصر قلبى الآه لو تكـره تحيا حزين
فوض أمــرك لله ده ارحم الراحمين
