سلموا لى ..قصيدة للشاعر / محمد زهران

سلّمولي ع الشوارع
ع المداخن والمصانع
ع الحمام اللي ف سطوحنا
ع البيوت اللي في ريحنا
ضحكة زي البن طازة
تكتم النزف ف جروحنا
ع القمر فوق نيل بلدنا
ع المراكب ع الحجارة
صوت ابويا لو يزعق
قهقهات البت (لارا)
حضن وشي للنسايم
واد بيغمز للعذاري
قبر جدي ف المحلة
الحرنكش والفراولة
إبراهيم سيدنا الدسوقي
صيادين بيقولوا هيلة
مشتاقين من بس ليلة
قولوا للعالم بحاله
رحلة واحدة وتاني راجع
سلمولي ع الشوارع