شعر( العمر لقطة) مسابقة الشعر العامى بقلم / أحمد طاحون

الاسم / أحمد طاحون
الشهره / فهد
خاص بمسابقه شعر العاميه
اسم القصيده ( العمر لقطه )

جوايا طفل ومركبه وجدار
والقلب آيل للسقوط والانهيار

والخضر لو قتل الوليد هاسكت
وابحث معاه لو حب عن اعذار

واخرم بايدي المركبه وياه
واسند بكتفي جميع حيطان الدار

بس المهم القلب يترمم
والجرح يشفى لو دواه النار

***************

كل اللي فاضل مني مش ملكي
كل اللي ملكي…… بجد مش عارف

لا العمر ينفع طوق نجاه للغير
والدم لاقط حزن او كارف

العين يادوب شيفاكوا م الظاهر
والقلب معمي حقيقي مش شايف

وان قولت اواجه نفسي بحقيقتي
اقف قصادي من الوجع خايف

**************

وافرش بحلمي فوق رصيف العمر
واكتب عليه السعر بالمعكوس

03سنه مليانه شهد ومر
مشوار مواجع باحضنه وبادوس

***************

وامشي ف طريقي وعمري وحداني
وباعيد شريط العمر من تاني

واضحك قوي على لقطه بالالوان
مكتوب عليها وقتي ومكاني

شوفت المصور فجأه عامل زوم
في الكدر بان دمعي واحزاني

وادين بتنزل فجأه على كتفي
وتقول لي عادي وحزن مجاني

من فيكوا كان خسران وضاع عمره
ومين ضحيه ومجني او جاني

احنا ف طريق الذكريات بنتهوه
كل القلوب الباكيه عنواني

وطني اكيد مستني يوم ارجع
ونعيد شريط العمر من تاني

واضحك قوي على لقطه بالالوان
مكتوب عليها زماني ومكاني

فيها المصور فجأه يعمل زوم
وتبان معاها كل احزاني

**********

واستنى دمعه تبل خدي البور
واستنى ورده تشق بستاني

واحضن ورقها البكر وابوسه
تفرح قوي وتقول لي بوس تاني

يحمر خدي من الكسوف لونها
والقاني فيها وهي وجداني

والخضر يرفع ايده عن قتلي
وتعوم مراكبي ف بحر اشجاني

والدمع ينزل م الشجن والشوق
ويقيم جدار فيه كنز جواني

متروك لطفلين لسه مش عارفين
بان ابوهم في الاساس صالح

#والموت_قدر

#فهد_طاحون