قصيده بعنوان…….. شهر الصيام
شهر الصيام…. شهر التجلى
خلي الايمان……ف القلب خلي
ليك أحلى طله…….ف الدنيا يا اللى
اللمه فيك……. تحلى تملى
أهلى وجيرانى…..والصحباجيه
ف الفجر ننزل…. دايما نصلى
فى جماعه واحده…..وقلوب ناديه
ومافيش مابينا……. شيئ مستخبى
وكل خير…… فيه قبله نيه
والخطوه ثابته….على التحدى
ياخلق تايهه …… فوقوا قوام
جالكوا خلاص…… شهر الصيام
فيه المحبه…… فيه الوئام
من تانى يلا…..نرمى السلام
والكل يسعى….ينسى الالأم
شبعنا توهه… ف دروب غيام
ع الصعب دوس……وفوت وعدى
والصبح نطلع…..يا أرزقيه
ع الخير ندور…..بنفوس قويه
والعصر يدن…….والمغربيه
على بلحه نفطر….ف المشربيه
وبهمه تانى ….. نقوم نصلى
والفرحه زايده….. والخير تملى
وقلوبنا هايمه….. بالروحانيه
والشهر يجرى… يفوت قوام
ويعيش مابينا….حب الصيام
وأما بتيجى……ساعة الفراق
يطرح مابينا……حب وولاء
ونقول سلام…… شهر الصيام
ويسيب ف أخره……أجمل هديه
كلمات الشاعر محمد ثروت عبد الحفيظ
