خاص بمسابقة مجلة همسة
الشعر العامى
الشاعر / محمد عاطف عبدالمنعم
البلد / مصر
قصيدة بإسم
شيخوخه
*****
الوش اهو زادت تجاعيده
وخطوط الشقى تملاه تزيده
بين حزن و مر العمر يمر
وزمن بيروح مش بنعيده
وخدود على عضم ومسلوخه
من بعد ما كانت منفوخه
وتملى كئيب والشعر يشيب
وكأنى دخلت ف شيخوخه
عايش فى الدنيا كما الزاهد
ولا بقدر أعافر ولا أناهد
لو بمشى وبطلع سلمتين
وكأنى بحارب و بجاهد
انا بكبر أكبر من سنى
واليوم بيعدى ياخد منى
أحلى ملامح من شكلى
وصحابى زمان مش عارفنى
الحل رياضه كتير واجرى
و أقلل من أكلى وشربى
كان لازم أحافظ من بدرى
من قبل الدنيا ما تغدر بى
وارتاح وأزود من نومى
وأصحى من بدرى ألحق يومى
راح أقرب م اللى يفرحنى
وراح أهرب من كل همومى
