افتح الكشكول و دون فــ المشاهد و الحوار. بقلم الشاعر / محمود رضا

1 – من بعيد فـ نهار بيضحك
كاس لمون حاضن شفايف
جنب منه قلب صدق
ان وجع الحب زايف
قهوة بردت / لما طال وقت السكوت
جنب منها سجارة دبلت / طعمها كان اصله موت

# خد كلوس قرب و دقق
حيد التعابير و حقق
غوص قوي جوه المشاعر
و اجتهد اكتر يا شاعر ،،
ابتكر عالم موازي
مـ الساعة دي / خلي قلمك انحيازي

2 – اوضه ضلمه بسقف عالي و الستاير مفتوحين
رغم جوف الليل ملالي / السهر حالف يمين
و السجاره هيه هيه
نفس دخانها الخنيق
تبغها غرقان آسية
مهما يشرب / عمرها ما تبل ريق
ساعه واقفه / فوق جدار من همه شايب
و الغريب فــ اﻻمر فعلا / انها دقت حضور
اعلنت موت المشاعر
فتحت باب القبور
و البطل بالحيره حاير
نبضه بيهز الستاير
تل همه يقيم عماير
فــ اﻻساس / مش موزونين

3 – شوت داخلي ،،
بنت قدام المرايه و الجدايل مفرودين
حسنها فــ الوصف آيه دمعها سايل حزين
و السؤال لساته داير
شعره بيضه / طاله من قلب الضفاير

4 – شوت خارجي
جنب نهر النيل كراسي جوه قهوه و ناس و زيطه
ضفة مليانه بــ مراسي و البراح مقفول بحيطه
البطل قاعد و قاعده / جنب منه ام الضفاير
القلوب بالنبض خايفه / بس صدق عيونها ظاهر

5 – زووم إن على تفاصيل الصوره
ايد بتحضن نبض ايد
بالملامح مش صبوره
حولت ناره لــ جليد
الفراق فـ حضرة المشهد حرام
و القلوب مع كل ثانيه / تغزل الاحلام و تنده للغرام هل من مزيد ،، !

* لحظه سكوت
التطابق فـ الحكاية زاد قوي
فين يا شاعر رسمتك
فين براعة كلمتك
فين تجلي الوصف لما
ترتجل عالم موازي
ليه الحقيقه بتكتبك
رغم قولنا مــ الساعة دى / القلم يبقي انحيازى

# نعود تاني لبداية النص ،،،
يا كل حروف بتتلون
و بتحول
بطل فعلي ،، لدور كومبارس
الكلام بالوحي اوحي / للحروف تنقش نهاية
و النهاية فــ ارض ثابته
مثلما كانت البداية
مش ضروري النص بتطابق بأصله
الحروف فــ اﻻصل جايه / تربط النقص بــ فواصله

‫#‏والنهاية‬ ،،،
حب صادق / حب واصل منتهى حدود البراح

حكاية قلب لــ / محمود رضا