صاحبي محمد
قصيدة بقلم محمد حسن عبد العليم
كنا بنضحك واحنا عيال ….. كنا بنلعب واحنا عيال
كنا بنسبق بعض وننزل ……….. نلعب كورة براحة بال
كان بيقوللي ياواد ياحمار …….. بطل طيبة ليل ونهار
أضرب كل هموم الدنيا …. خليك واقف عال العال
كان بيقوللي بلاش تتعاطف ….. مع ناس عايشة مش بتلاطف
أصل الناس دي شايفة الدنيا …… ليهم بس وهما مثال
كان بيقوللي وينصح فيا .. إن الدنيا بتيجي في ثانية
وإن الدنيا بتمشي في ثانية … خليك صاحي طول الاحوال
كان بيقوللي أنسى ما فاتك ….. ركز وأمشي وحقق ذاتك
حافظ على شكلك وحياتك … وأوعى تحب قلب إتشال
مات الصاحب مات الأخ …. وقف القلب ووقف المخ
مات الجسم وصاحبه ارتاح … صاحبي محمد إبن جمال
