قصيدة بعنوان/ضاع الكلام. . الشاعرجوده فتحي عبدالعال
مصر-اسيوط -ديروط – خارفه
ت 01284131855
………………………….
حتى الوعود ملهاش حدود .. بين البشر ..
حتى الكلام ملوش وجود .. زي المطر ..
حتى المعاني بتتنسي ..
حتي الحروف اللي بترسم خطوتك ..
ملهاش مكان .. ملهاش آثر ..
تاهت معاني الاحترام ..
والكلام أصبح رماد ..
أصبح عناد أصبح خطر ..
شوف اللي كان أيام زمان بين الجدود ..
حتي الكلام كان ليه حدود ..
كان ليه ميزان زي الوتر ..
أصبح نار ملهاش قرار ..
أصبح محني بدم البشر ..
كان الجدود ليها احترام ..
كان لما ينده يا ولد .. نفضل قيام ..
علمونا أزاي نكون ..
أزاي نحفر ف الصخور ..
أزاي نثور .. أزاي نهتف ف الميدان ..
أزاي نكون جنود أسود ..
أزاي نحافظ ع العهود ..ضاع الكلام ..
ضاع الكلام ..أصبح غيوم أصبح ظلام ..
راح الأمان .. مبقاش أمان ..
وضاع الكلام وسط الزحام ..
حتي السلام مبقاش سلام ..
كان زمان ..
كان زمان القلب صافي ..
كان زمان فيه أحترام ..
كنا نهجر أو نخاصم ..
كنا نرجع مهما كان ..
كنا نحكي ف الحكاوي ..
كنا نضحك ع القهاوي ..
كنا نجري ف الميدان ..
كنا نزرع ورد نادي ..
كنا نركب ع السواقي ..
كنا نلعب ف الغيطان ..
كنا نحلم بالأماني ..
كنا نكتب ف الأغاني ..
كنا نرسم ع الحيطان ..
مستورين عايشين تمام ..
هو ده كل اللي كان .. هو ده كان الكلام ..
كل ده أصبح سراب ..
كل ده أصبح مفيش ..
ضيعوه ولاد الكلاب ..
إنكسرنا عشان رغيف ..
الوشوش غير الوشوش ..
والناس شبه الوحوش ..
همهم بقى ف التوهان ..
الحكاية مش كلام ..
الحكاية شعب كان ..
ضيعوا كل المعاني ..
ضيعوا كل الكلام ..
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
