ضفاير نور
…………..
إغزلي م الرمله ضفاير نور
وارقصي ع الميّه ورشّي بخور
يا ماريّه ف حضنك عطر اليود
ونوارس جت ع العطر تدور
دا جبينك قمحي بلون النيل
وعيونك زرقه بلون بحرك
وعشانك قلبي يقول مواويل
وحياتِك مسحوره بسحرك
من أوّل ليلي ما داب فيكي
ولحد عيوني ما ترقيكي
محروسه عينيكي وحواليكي
والعشّه ف حضنك تبقى قصور
إغزلي م الرمله ضفاير نور
***
إتمشّي على البحر حوريّه
واتعايقي ولفّي ملايتك لف
دا لواحدك ف الدنيا ماريه
والألفه وباقي الكون ف الصف
دا هواكي ف وقت الصيف سكر
بيرجّع للقلب شبابه
وترابك من حنّه وعنبر
يشتاقله اللي سابوه أو غابوا
وانا زي ولادك باشتاقلك
مع إنّي ما سيبتش يوم حضنك
م انا قلبي العاشقك واحلفلك
بيقوللي انه بحبك مسحور
إغزلي م الرمله ضفاير نور
،،بقلم،،،
اميمة سلطان
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
