ط
مسابقة الشعر العامى

ضل الأمل..مسابقة شعر العامية بقلم / على المرسى من مصر

على المرسى

(ضل الأمل)

الموج بينده ع اللى سامعينه
وأنا وانتى ف دموعنا بنتمشى
راسمين حكاية حب ف الكواليس
ياااه
ع الثوانى الحلوة لو تصدق
والليل أبو السروال طويل
يقصر ويسمعنا
مشاعرنا يمكن تشبه الصلوات
قُداس ومحراب ع المشاع
تراتيل
ذكراك هابيل إعلان ميلاد الخوف
والعتمه والأشباح
أرواح بتتلاقى بدون مواعيد
ليه لما أشوفك
بنتفض ساكن
وانتِ اللى زيك محسوبين مساكين
ضل الأمل على كفك النونو
زى إختصار الوقت للمسافات
عاشق زوايا النور ف شِبّاكك
مزروع حنانك
جوا أوصالى
وأنا غصب عنى الغربه عنوانى
وصّيت ف سطر كتبته للمرسال
يبكينى رغم التوهه والترحال
أرض الخصوبه البكر
يا أنتِ
يا ضحكه تشبه ضحكتى
بالذات
هتف الغريب
واتمد حبل الشوف
وأنا وأنتِ
لسّانا بنتمشى

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى