رضا محمد زيادة
مصر
شعر عامية
طاقية الإخفا
الناس لبعض بيوت
وانا ليه مليش مأوىٰ؟
أيام بتستقوىٰ
قاتلة ف عيوني الضَي
وانا برضوا لسهّ اقوىٰ
ناصُبه عَزايا ليه
وانا قلبي لسّاه حَي؟
يا بُكره ياللي جاي
إيه تاني شايل لي
نفس السيناريو بعيد
أحداثُه بالمللي
بلا cut ولا مونتاج
ومشاهده محسوبة
كُل الوشوش في العَزا
سِحنتها مقلوبة
آدي اللي بتحبني
و ف غيبتي طعناني
وآدي اللي كات في الضيق
والشدة شايلاني
وآدي عينين نِشفت والدمع جوّاني
كل الوشوش كَرمِشت
والحُزن كاساهُم
وانا قاعدة وياهم
باتملّىٰ في المصمصَة
وف لويه الشِفة
سامعة كلام همهمَة
بكفايه فارقينا
لسّاكي ليه معافرة
ومكلبشَة فينا
ربك يعافينا
رغم البراح والوسَع
الحلم كان عَ الأد
والفرح مش لينا
يا ليل مالوش آخر
و ايام ما بتهدي
لابسالي توب إسود
وانا بعشق الوردي
والقلب زي الندىٰ
وعودُه لسّه اخضر
والروح بتتمخطر
والخد ورد أحمر
والضحكة زي الطير
طايرة على الشِفة
كل الجمال مِتشاف
والحُزن جوُاني
عُمري ماكنت باخاف
و فيّا 100 قوة
ترجعني اعيش تاني
طب إيه ح َاقول تاني
نفسي وعجباني
ناب الوجع مغروس
وبقوة في حشايا
لكني نَسّايه
والقلب لسّاه قوي
بيدُق دقاتُه
دايما يلِم الفرح م العُمر لو فاتُه
وان حَس يوم بالوجع!
اعمله مش شايفه
واخرج في 100 زفّة
لابسه طاقية لخفا
واخبي آهاتُه
والخوف ملوهش مكان
ولا عمره كان طبعُه
بادهِن حيطانُه بأمل
وان كان رواه دمعُه
وان يوم ضَناه الشوق!
لا بحايلُه ولا اطاوعُه
الناس لبعض بيوت
وانا قلبي مين سايعُه؟
