قصيدة للمسابقة ـــــــــــــــــــــــ طرح الوجع ـــــــــــــــــــــــ شعر / سماح هلال ـــــــــــــــــــــــــــــــــــــــــــــــــــــــــــــ
طرح الوجع
إطلق سراحي من إيديكْ الطير لا بدّ في يوم يطيرْ قدام عينيكْ قلبي الأسير ما بقاش يحس بوحدتهْ يا غربتهْ وانا اللي عصفورة
ومحبوسة في قفصْ
وفضلت تتفرج عليها وبارتياحْ
كتّفت بإديك الجناحْ
وكسرت باليأس الأملْ
دقاتها بتئنّ بوجعْ
ألوانها طارحة من الآهاتْ
قهر وسكاتْ
ودموعها بتكسّر في قضبان سجنها
مع إنّها
خايفة وما بتبكيشْ
كان نفسها
لو يوم تعيشْ
وتكسّر الباب اللي فاصلْ
بين دموعها وضحكها
أحلامي بتزقّ بإيديها في القفصْ
عمالة بتعافر كدا
تخطف خلاص الروح من الكتمة
عين النهار عتمة
يا طلعة الروح اللي مش طالعة
لا إنتِ في يوم طالعة
ولا انتِ راجعة في يوم
شدي الهموم م الحلق
وحياتي ليه بالعكس
مش زي باقي الخلق
مدّي إيديكِ واهربي
دا جروحي ملّت من الألمْ
صوتي بُكا وانت اللي مش فاهمْ
لو كان دا عدلك في الهوى
فالعدل دا ظالمْ
أقوى الجراحْ
لحظة ما سكينه بتحمى وتجرحكْ
ما تحسّ بيه
هو كدا جرحي أنا
حاسب عليه
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
