قصيدة: “عاشقك أنا”
شعر/ محمود وجيه محمود عويضه
البلد/ مصر
خاص بمسابقة الشعر العامى
عاشقك انا
يا محيره قلبى اللى داب
بمحبتك
عاشقك
وعاشق رقتك
عاشق سماكى
وضل قلبك
اللى نابع بالمحبه
من نجوم ليلك وقمرك
لساكى برضه بتحلمى
وبتندمى
على حلم ضاع
من غير تمن
ويا الزمن
هب ريح الحلم فيكى
صحى فيكى
عصور مضت
واتمرمغت
جوا احضانك بشر
عايشين ف حلمك الغبى
وانا مش نبى
انا كل ما اجى
اصحى فيكى
حلم ميت
التقيكى
حابه دور المظلومين
بس برضه لسه عاشقك
راكبين سفينة حبنا
انا وانتى بس لوحدنا
وامسك اديكى
ومن كسوفك
دمعتك تنزل بضحكه
وقت الغروب
رافض يغيب
فرحان بعشقك للسما
غنى القمر
رقصت نجوم الليل
بفرحه
وبديت اسرع مركبى
علشان ينول ضل الشجر
لحظة لقاكى
وينول كمان
لمسة اديكى الدفيانين
وبحور حنين
جواها ريحه م الطيابه
وانا قلبى يشبه بطن نيلك
زى ليلك
لما بيغازل نهارك
اعشقينى ويا ضلك
واوعى تنسى ان قلبى
رغم كل الظلم عشقك
