@@@@@@@@
والله صبرت يا عبد العال
بعد الهم وضيق الحال
ربنا عوض صبرك خير
كان علي راسك هم تلال
جريت تاني البليه ف إيدك
واتشطرت ف جمع المال
شيل علي قدك واللي يفيدك
مين هيرجع رزق حلال
قوم يا صديقي ودلع نفسك
واصرف ف المحروسه شوال
واعطف برضوعلي المساكين
صدقه ف يوم الحشر جبال
واعمل هيصه ولم حبايبك
وافرش فوق الارض رمال
واعمل حفله كمان ع الضيق
فيه تُهامي أو متقال
وادبح بقره تكون معلوفه
وانحر ياله بقرن غزال
دانت بجد عريس اليله
فرح وعِز وراحة بال
فجأءه لاقتني صحيت من نومي
والحتوته خيال ف خيال
كنت ساعتها هشق هدومي
والموضوع بقي شغل عيال
قلت أدور تاني عليه
رحت يمين وحدفت شمال
قلت يا أهل الخير دلوني
حد يجب لي عبد العال
قالوا شغال بيبيع مناديل
واهي شغلانه ورزق حلال
لجل يأكل حتي أولاده
ولاّ يكّفي الست دلال
قلت يا عيني عليك يا صديقي
شايل هم يكفي جبال
فين ايام العلم يا صحبي
وانت معايا سؤال بسؤال
حتي الحلم اللي انا شوفتولك
زي الحظ لاقيته محال
مين كان يقدر يعرف إنك
بعد العلم تكون شيال
انا مش قاصد أعيب ف المهنه
أو بتريق ع العمال
هما اخواتي وهما حبايبي
واللي تاريخهم رزق حلال
انا بتكلم ع اللي اتعلم
واللي طموحه كان موال
كان بيفكر يبقي مهندس
أو بيخطط للاجيال
أهو دلوقتي مجرد عامل
أو مسكين علي أد الحال
@@@@@@@@@
بقلم /// طه إبراهيم
