عيش انسان
………
لما الدنيا ف لحظة تخاصمك
تصبح ضدك
تمشي السكة بنص صديق
أو تتعكر فيها لوحدك
بص لنفسك
شوف العيب ف شوارع روحك
واللا العيب ف الدنيا بحالها
سافر ابعد نجمة وحاول
تنظر للدنيا واحوالها
لو حسيت انها مش دنيا
صبحت غابة
وان العالم كله ديابة
اعرف انك كنت الصح
إنما جيت ف زمان الشح
المعد وم منه الاخلاق
وان الناس ف البخل سواء
كله يمد الايد وبياخد
ومفيش حد ف لحظة بيدي
حاول تدخل عالم تاني
لو من خرم الإبرة تعدي
جايز تلقى..
واحد زيك
واحد شبهك
انسان من جواه انسان
كائن حي بقلب وروح
مش كائن على جثث الخلق
ولا واحد ياخدك بالحضن
تدخل تلقى جماجم نايمة
دخلت قبلك حبل الشنق
ولا زيف لابس توب الحق
ولا بلياتشوا بمليون وش
خليك طيب دايما لكن
دايما فاهم فين الغش
اوعي تروح سكة مترجعش
أو تدخل بين القضبان
اوعي تصاحب واحد خاين
اوعي تميل على حد جبان
واما الليل العتمة يطول
بكره اكيد النور ح يبان
مهما الدنيا بحالها تخاصمك
اوعي يهمك
عيش دايما ومصالح نفسك
عيش وسط التعابين
انسان…
محمد ابو العبادى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
