ط
مسابقة الشعر العامى

ع المعاش…مسابقة الشعر العامى .. بقلم / محمد عبد الله بدران من مصر

خاص بالمسابقه
الشعر العامي
محمد محمد عبدالله بدران
قصيدة/ ع المعاش

سكة سفر…
وخدانا فيها الذكريات
وبنفتكر ….
كل ليلة من اللي فات
جايز تكون …
اخر ليالي عمرنا
يمكن نسيب ….
الذكري والايام هنا
الليل محاوط في المكان
صوت الرصيف …
عامل موسيقي تصويريه
بيهدد الليل بالصداع …
فيرد فيا .
صداع يزيد … فأبدأ اعيد
في لوحة تانيه من الكتابه
طول الطريق … حولني كتله
من الملل ومن الكآبه
وأكيد شويه من القلق ..
حالة زهق ….
من دماغي وم اللي فيها
من سجاير صاحبي ..
والدخنه اللي فيها .
من كراسي فاضيه جانبي
نفسي انقل نفسي لكن …
خايف البرد اللي ساكن .
كتبت كام بيت في السياسه
رجعت تاني مسحتهم .
وهكتب ايه ؟….
القصد سيبك م السياسه
عشان تزعل
ناموا اللي كانوا ع الكراسي
ما عدش حد ……
الليل طويل ….
والقطر برد ….
ماشي ببطء …
كأنه خايف ينكفي
لحظات بيجي النور
وساعات ينطفي
شريط حياتي مر فجأه
بس صورة مشوشره
زي تليفزيون قديم
بيرجع الصوره لورا
شويه ظهرت ذكري وحشه
جت وكانت الصورة ثابته
ولما ظهرت لحظه حلوه
كات ساعتها الشاشه باهته
صفارة القطر اللي تسور
فوقتني من الغفل
حسيت حياتي بتتقفل .
من طول مسافة سكتي
بين الاماني والانتظار
وحلم كان موجود وطار
البرد زاد علي ذكرياتي
وكنت عاوز توب قماش
خلصت الافكار…. في ثانيه
قصيدتي طلعت ع المعاش

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى