الشاعر السيد عبد الجابر
المدينة :الاسكندرية
المسابقة شعر العامية
غربليهم تعرفيهم
بحبك بس مش قايل يا غصن ريحان بيتمايل
نقشتك قلب ف ضلوعي يانهر من الهنا سايل
بحبك سيل حنين جارف يتوه قلبي في شلالها
وقلبي لما يغزلها.. يجيني النصر ف رسايل
***************
بحبك قلب يرسمني ما بين الوهم والأحلام
ويأسي لما يقتلني يجيني الضي لو ف منام
ونتقاسم كاسات الصبر.. كاس ورا كاس
ولو نعصر سنين العمر يفيض الضي ع الأيام
********************
وقلبي غير بقيت الناس… مايعرفشي يقول حبيت
ولا املى من حنيني الكاس وءالف ف الغرام ميت بيت
ولا اكتب لك على جناحي ياروحي العشق( صباحي)
ولااغرس روحي ف رياحي واطير ليكي واقول حنيت
********************
وماباقولش الكلام معسول ولااتلون كــ عم( فلول )
ولاحلمت بطبق فتة.. وجوفك مـ الضنى منحول
ولازيفت إحساسي.. ولا كارهك ولا قاسي
زرعت ف قلبي إخلاصي وقمت من الوفا مقتول
*******************
مانا القلب اللي كان قلبك لروحه الضي
وأنا اللي عملت إخلاصي لكيفك شاي
وأنا شمسك وأنا ضلك وأنا البدر اللي يفضلك
ولما العتمة توصلك.. اجيلك بالنهار الجي
******************
ده انا اللي زارع فرح وفرشته على وشك
وأنا اللي طيري انجرح ولا بعت يوم عَشِك
وما كنش يوم ع البال اتوه ف ألف سؤال
مين قَدم الأهوال ؟ ومين بالأمل رشك ؟
******************
ياقصة حب علشاني كتبها الكون
قومي وساندي بركاني تلتقيني أكون
مراية وشك المرمر تعرف الأطهر
ولما الندل يتصور تلتقيه ميت لون
******************
عرفتي مين عدو لمين ومين ف الفرح سقاكي أنين
عرفتي مين سرق حلمك ومين علمك لبسه الرياحين
ولاكل من نسج الهوى قلبه ارتوى وسقاكي من ضيه
ولا من جمع الرجال شق المحال وقلنا م الصادقين
