فتات من خوف .مسابقة الشعر العامى . بقلم/ أحمد محمد سامي النعناعي

الاسم: أحمد محمد سامي النعناعي
الشهرة: أحمد سامي
العنوان: قطور – الغربية – مصر
البريد: [email protected]
رقم الموبايل: 01024528434
المجال: الشعر العامي
اسم القصيدة: فُتات من خوف
القصيدة..
عديت بـ طولي البحر ولا هَزِّني
نَهْش القروش في بواقي بني آدمين
الكل خاف لا يطولُه سِنّ القرش
وانا كنت همِّي يا رب هنقِذ مين!
فـَ وصلت شَطّ البحر علي كَفِّي
عشرين دراع وراسين وجسمي النَيّ
حطيت بواقي الإنهزام تَحتي ..
وصديقي كامل كان خلاص مش جايّ
القِرش ماسك رِجلُه من ناحية ..
بيشِد فيها لكنُّه مقطعهاش!
وانا بَردُه ماسِك رجلُه من ناحية ..
والضلمة صعبة ونور عنيَّا فلاش
القِرش حاطط رِجلي جُوَّه عنيه
لهِّيتُه صاحبي اتفَكّ منُّه وعاش
القِرش طالني أو أنا طولتُه ..
معرفش لكن فُوقت في الإنعاش!
مقدرش احدِّد أي شئ نُولتُه
غير كفِّي مِن لَمّ الحبايب باش
معرفش ليه رغم ان انا خَطَّاء
القرش سابني وعَضْعَضْ الباقيين
يمكن عشان أنا كنت مش مهتم
بـ حياتي قَدّ ما همّني التانيين!
والموت طبيعتُه بيقرَا افكارنا ..
فَـ يسيب تاعِبنا وياخد الغاليين!
في دماغي فعلاً في وجود لـ كَمين
قررت ابعد عن خُطَي فِكري ..
وأشوف صحابي وكَفِّي والمَركِب
فـَ لمَحت أول ما ظهر منهُم ..
كان صاحبي أكرم ناقصُه رِجل شمال
فـَ سألتُه مالك ياد ضعيف قالِّي:
كان همّي اعيش علشان ورايا عيال
مُحسِن قاطعنا وقالّي: كنت شجاع
انا إيدي راحِت أصلي كنت بعيش
واخد حياتي وحقِّي كلُّه دراع ..
كامل جذَبني وقام فـَ خبطُه الشيش!
ولقيتُه زيّ مـَ هوّ مَتْلَطِّش!
فـَ ناديتُه قالّي يا صاحبي والله
شدّيتني سيبتَك لـ القروش وَحدَك
من فَزَعي كانت روحي مطويَّة
ورجعتلك – قام القدَر ساعدَك
والقِرش جاتلُه – سَكتَة قلبيَّة!
غَمّيت في وجَعي بـ عيني مقدرتِش
فتَّحت قام صاب العَمَي عنيَّا
كات شُوكة باين برده مافهِمتش
ولا طالني غِيرَك تحت رجليَّا
شَدِّيت ايديك وفضلت اطَبِّش بيك
فـَ وصِلت شَطّ البحر بيك وَنَّاس
في ساعتها كامل شَلّ تفكيري ..
ده لأنُّه فعلاً شُغلته قَنّاص!
وساعتها بس فهمت حتمًا ليه ..
انا وَحدي بس طلعت منها سَليم
كانوا الجميع بيهِمُهم نفْسُهم ..
وانا وَحدي كُنت هاممني بس الناس!