ط
مسابقة الشعر العامى

فشل شاعر . مسابقة الشعر العامى بقلم / أكرم حسن أحمد . مصر

خاص بمسابقة همسة الأدبية
قصيدة شعر بالعامية المصرية
الإسم / أكرم حسن أحمد
تليفون / 01009117229 أو 01026771143
فشل شاعر
…….

أنا دلوقتي يعني اﻵن
بقيت قلقان ..
ومطمن ف ذات الوقت
بقيت فرحان ..
حزين جداً .. ومني زهقت
حاولت كتير اكون شاعر..
لكني فشلت
فسيبت الساحه من غيري..
وسيبت حاجات
وسيبت سنين بدون ياسمين
وسيبت النيل
دموع بتسيل ف حضن بنات
خساره كسبتها وارتحت
صعود للقمه بس لتحت
ولسه بكمل الأوجاع
وباستعباط
خروج من دايرة الإحباط
مربع ضاق
مثلث قائم الزاويه
وبرجل ضاع
وشكل عبيط
ماهوش متوازي ف الأضلاع
مسافه كبيره بين ضلعين ف نفس الشكل
ونقطه وحيده ف الدايره
وقُطر ضعيف
سواد كادح.. لكنه نضيف
واصفى من قلوب خانت
وضوح غامض
غموض بانت
حاجات ف الذكرى موجوده
قلوب كارها الحياه دلوقت
بتعشق ذكريات كانت
وجايز زي ماقال فيثاغورث
ويمكن لاء
وممكن عكسُه عنده الحق
وجود العُطل ف الإصلاح
وباب مفتوح بدون مفتاح
وباين إنه مش باين ..
شروخ الشق
وم العادي
مافيش عادي
بريئه الذكريات فينا
وصول السن لل…
ولسه حُضنُه ف اعدادي
مدينه ف الخيال الجي
بتسكُن حلمها الماضي
وفاضي الوقت ف الأوقات
سقوط ناجح
نجاح ساقط
وصول للحل دون إيجابات
خلاص خلّصت
نجحت ف إني اكون فاشل
وصلت لإني مش واصل
مافيش فاصل
مابين الأرض والسماوات
تجوز الرحمه ع الأموات
ولبس الحر عز البرد
وترك الموضه للأرصاد
دموعي بتبتسم لليأس
طموحي بيكتمل بالنقص
ف بدله بتتلبس للجاه
وبدله بتتلبس للرقص
حكايتي بتختصر حكايات
حكاوي بتبتدي بنهايات
وناي بيموت
وعود عزفُه كمانجه بيات
سلوك النت وسلوكي
بتقْطع كل يوم فقرات
عطارد لسه بيطارد..
وصول الإنس لحدوده
حياة الأنس ممنوعه تكون موجوده ف المريخ
يا إنس عجيب..
ومَيْت بالحياه ع الأرض
بتبحث ليه على المريخ وعن زُحل؟!
مافيش منطق ولا برهان
وكل المعطيات بتقول..
بإن الكون.. بكل مافيه.. دا ملك الله
وان الموت.. هيجي بعد منه حياه
وإن الظلم مش هيدوم
وإني فشلت
فسيبوا الضحكه للأسفلت
#اكرم_حسن

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى