شعر عامى
مصر _الاقصر
احمد ربيع سليمان ..الشهير ب حماده النخيلى
((فى وسط الزحمة وحْدانٍى ))
فى وسط الزحمة وحداتى
بنادِى الخَلْق
واتارى الخلقِ وخدانى
لسِكة خنق
وفى الزحمة بشر عايشين
ومش عايشين
تِقَرب حبَّة وتشوفهم
تقول شكل البشر هُمَّا دا فى وشوشهم
لكن جُوَّه الجلود سكنت
خلايق زيُّهم تانيين
ولابسين الهموم هندام
لحر الصيف
على ظهر الحياة عايشين
كمثل الضيف
وفرحِتهم إذا شافها الشِتا
عصفت رياح الفرح جوَّاهم
كما الإعصار بوجهه مخيف
وفى الزحمة يباح القتل
لضحكة تايهه م الأحزان
كأنَّها طفل
فقد أهلهُ ومرسومة على وجهُ
ابتسامة خوف
على خدوا بتتنهد وكلها زيف
وفى الزحمة طبول الغُلب
على روس البشر بتدق
وتطحن هِىَّ فى عظامهم
ولا بترِق
لحال العجز جوَّاهم
لا يوم حنِت ولا لانت
وطول العمر طحناهم
يا زحمة هُمَّا ظالمينك
بأحوالهم وأفعالهم
وَلاَّ انتِى يا زحمة ظلماهم
فى وسط الزحمة وحدانى
بنادى الخلق
واتارى الخلق وخدانى
لسكة خنق
