===================== كلمات دويتو (صرخة زوجة ) الشعري للشاعرة / أمل صيدم (هي) والشاعر / علي مدكور (هو ) ========================= هي ===== ما أنيش جاريه عشان لما تناديني بعلو الصوت تلاقيني عليك جاريه هو ===== ومين قال يا أمل عمري بإن الملكه لو لبت ندا شريكها بقت جاريه أكيد الأم قالت لك شريك العمر لو تاجك حيبقه عبد في بلاطك وحتى لو صحيح جاريه هي ==== بلاش تخدعني من فضلك وتغلبني بكلام الأم أنا إنسانه لحم ودم ففوق م الوهم واعرف إني كنت ف يوم لقلبك ده مجرد حلم هو ===== أكيد كنتِ مجرد حلم لكني صحيت لقيته كابوس بتشكي كتير وأنا عندي كتير جوايه عاش محبوس يا نصي لو تكوني أرض أخضرها وأرويها أكون فوق سما وأنتِ تكوني نجمتي فيها ومش ف حياتي لحم ودم لكن ف حياتي إنسانه وحسمع شكوتك دايماً بروح للود عطشانه هي ===== وكنت بتسعى وتسافر تهد الدنيا وتعافر عشان أبقه في بيتك ملكه جوه القصر ولما قدرت تتمكن تشربها كاسات القهر هو ==== أشربها كاسات القهر ؟! أهد الدنيا وأسافر واشوف المر وأعافر عشان خاطرك وف الآخر تقولي إني شربتك كاسات القهر وليه القصر وليه الغربه والهده لا هيه القسوه محتاجه من الراجل لده ولده كاسات القهر في بلدي كتير خالص وأنا والله لكلامك ما أنيش ناقص يا ريتني ما تهت في الغربه عشان ناكره بتشعر إن كاساتي كاسات القهر هي ===== أنا زوجتك ما أنيش كرسي ولا شقه حتتأجر مجرد شهر أنا مشوار طويل وياك وطول العمر واقفه معاك أنا إللي لما تتأخر في شغلك يوم تبات سهرانه تستناك هو ===== وأنا ما نسيتش مين أنتِ ولا عمرك ف يوم هنتي لكن وحياة ليالينا بلاش تقوليلي واقفه معاك وين قال إن أنا واقف أنا لافف أنا مربوط في طاحونه ف دنيا صعبه مجنونه ومش عاجبك أكون ف الشغل متأخر وتستني أقلك إيه ؟ مادام عقلك عجز يفرق ما بين الشغل والراحه يا مرتاحه لا تستني ولا تقولي لي بستناك هي ====== بلاش زوجتك أنا الأم إاللي جابت لك ولادك حته من كبدك أنا كونك أنا إللي واقفه قدام العدا جمبك أنا حصونك هو ==== يا ست الكل ده دورك حياه مشتركه جمعانا تكوني فيها دفيانه في قصر تشيده إيدي وليه حقوق تصونيها وتدعي الرب وتزيدي وتتواصلي بأحلى كلام ديه ساعات الوصال ساعه وساعات الخصام أيام هي ===== نسيت ليه إني إنسانه وطول اليوم مع ولادك وشقيانه كمان مستكتر الراحه دأنا ف همومي غرقانه هو ==== بلاش تاني تقولي نسيت ده أنتِ مرايتي جوه البيت وبره البيت وبحر الدنيا صعب أخوضه وحداني وما يكفيش أكون مجداف مالوش تاني هي ======== ولما ف يوم يزورنا كل أصحابك تناديني فين القهوة ؟ أجهزها بنار تعبي ومهما كنت تعبانه ما أقلش الآه وتتريق لو السكر ما أهوش مظبوط يا قلبك ياه وفي الآخر تقول للناس ما أنيش مبسوط وتتنهد بقولة آه هو ===== صحابي صحاب على القهوه لكن قصرك في عيني عش ما يدخلهوش طيور غيرنا ظلمتيني بشئ ما حصلش ولكن قهوتك ليه أبوسها حتى من غير وش وأقلك إيه ده لو غيري عملها يوم وحول مسكنه لكافيه أكيد يبقه عليه اللوم هي ======== أنا صابره على طبعك برغم القلب منه عليل ولا بطلب كتير منك وراضيه حتى لو بقليل لا عمري في يوم عاديت أهلك ولا بهتم بالتقليل ده أنا إنسانه حساسه ماليش في اللك والتهويل وفي الإخر تقول الآه هو ====== بيوت النحل تكوينها قليل يترص جمب قليل بلاش تجريحي بالتهويل وكتر الشكوى والتقليل أنا بردو شريك عمرك وأتمنى ما أقلش الآه هي ===== يا زوج موجود و مش موجود ورغم البعد أنا إللي بحط في غيابك لنفسي حدود هو ==== حدودك مش حدود جسمك يا عايشه بفكر ماله حدود ضروري بالرضى تبني ما بين فكرك وغيري سدود يا خوفي شكوتك تهد سدود ياما وتلغي حدود هي ======= اقلك إيه عشان تفهم أنا زوجتك ما أنيش جاريه وبينا في حياه جاريه هو ===== كفايه كلام أنا اتعلمت من عشرة ناس خسروا الحياه بالجهل كلام الست عن جوزها يطمع فيها حتى الأهل وأصل السمكه لو بالغت في فتح الفم صيدها سهل هي ====== أنا زوجتك ولسه بينا خيط مشدود أنا زوجتك ما أنيش جاريه مسلسلها بحبل قيود هو ====== مسلسها برباط يمنع دخول أولادنا دار ايتام رباط الشرع لو يقطع حيبقه الكون حرام في حرام يا رابطاني بحبل قيود عشان العشره سامحيني وسامحيني عشان خاطري إذا في مره زعلتك وقد ما ربنا اداني في نني العين أنا شلتك أنا رديت بإحساسي ويمكن يستفيد الغير سلام يا زيت لنبراسي يا جاريه في الحياه الخير هي ===== تعبت من الكلام وياك أقول كلمه بعشره ترد وحرجع أقول ما أنيش جاريه لكن بينا الحياه والود وطول ما أنا و أنتَ عايشينها حنكسر بينا مليون سد ===================================
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
