قصيدة (فيلم الحياة )
شعر//علاء الدين علي
السويس //مصر
01227871775
فيلم الحياة
********
ف المخ جزء الذكريات
أرشيف زعل
وهموم سنين العمر فيه متجمعة
أحداث لفيلم عن الألم
همسة حزينة بتعرضه
والعرض دايما مستمر
يادوب يشب الوعي فينا
بنتولد نبكي الفراق
من سن جاهل كل شئ
لحد توب المنتهى
بينهم زمن فيلم الحياة
نستلهم الأوجاع ونكتب جرحنا
عدة مشاهد تختلف عن بعضها
وبيفضل المشهد حزين
لحظة سعادة وإنبساط
نعمل لها
مونتاج يقص البسمة على طول الحياة
فبنستمع ف التتر آهات الوجع
وموسيقى طول الفيلم تقتل فرحنا
والعرض مفروض إنه يتعاد كل يوم
وكإننا
من كير لدق المطرقة
زي الحديد
تشكيل بريق النني من تحت الندى
خلفية بيضا من سحب
أمطارها مش بس ف شتا
متعة صياغة حسنا نبض الشجن
وندوق ملوحة دمعنا وبنفتكر
كل البحور المالحة من سيل الدموع
مين فينا يقدر يفتكر
اللي إتحذف من فيلمنا
غير اللي يضحك في العزا
صايبه الجنون
**********
كلماتي / علاء الدين علي
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
