علق النجم محمد رمضان على أغنيته الجديدة “مافيا”، والتى طرحها خلال الأيام القليلة الماضية، وحققت نجاحا كبيرا للغاية، وقال مهنتنا قائمة على إسعاد الناس وتسلية الجمهور، دى مهام وظيفتنا إننا نسعد الجمهور، بتبسط جدا لما بأدى دور وأقدر أفرح الجمهور، اللى أنا بعتبره المدير بتاعى، فنحن كفنانين لنا مدير اسمه الجمهور، بيفصل ناس وبيرفد ناس وبيقعد ناس فى البيت، فبعد كرم ربنا، الجمهور نعمة ربنا”.
وعن نجاح الأغنية واحتلالها تريندات تويتر قال رمضان :”أنا ممثل فقط ولست مطربا، ولكن أقدم كل ما يسعد الناس، أنا عملت إعلان غنيت فيه أغنية عجبت الناس ونجحت نجاح ملحوظ، جمهورى لما عجبه الموضوع، قدمت بعدها أغانى بشكل متطور أكتر، والأغانى أقدمها فى وقت فراغى، لأنها ليست مهنتى الأساسية”.
وبسؤاله عما يردده الجمهور فى الشارع وعلى السوشيال ميديا بالإضافة لعدد كبير من العاملين فى الوسط الفنى بأن الأغنية يرد بها على أغنية “كوبرا”، التى أنتجها رجل الأعمال نجيب ساويرس، وتغنت بها بشرى، قال : ” الأغنية دى مش برد بيها على حد تماما، والأغنية دى عاملها لجمهورى، ومخلص الأوديو من شهرين تقريبا، ومصورها من 10 أيام، وبعدين أستاذ نجيب ساويرس على ما بسمع بيحب الفن، وأى حد بيحب مهنتى لازم أقدره وأحترمه، وإن كان أنتج مشروع بيسىء ليا، فأنا بتغاضى عن هذا الزعل، وبشكره إنه متواجد فى الفن وبينتج أفلام وعنده فيلم جديد اسمه “الضيف” مع المخرج هادى الباجورى، وبقوله أنا مش زعلان منك، والأغنية دى ملهاش علاقة بيك”.
وفى النهاية وجه رمضان الشكر لجمهوره قائلا :” يارب أكون قد هذا الحب وقد هذه المساندة الكبيرة، وكل المجهود سواء ذهنى أو بدنى ببذله من أجل إسعاد الجمهور، وأنتوا نعمة كبيرة جدا بحمد ربنا عليها طول ما أنا عايش”.
كان النجم محمد رمضان قد طرح أغنية جديدة خلال الأيام القليلة الماضية بعنوان “مافيا”، وحققت نجاحا كبيرا للغاية، وهى من إخراج ياسر سامى، من كلمات إسلام شندى وكانكا ومحمد الفنان، وألحان إسلام الأبيض ومونتى، وتوزيع ديزل، ومهندس الصوت هانى محروس.
