ط
مسابقة الشعر العامى

قصاقيص العشاق .مسابقة الشعر العامى بقلم صلوى صلاح العينى من مصر

خاص بالمسابقة عاميه
سلوى صلاح الشهيرة ب (( سلوى العينى ))

(( قصاقيص العشاق ))

أناوالحواديت ومرايتى
بنعدى ساعات ونهدى
علي باب الذكري المنسيه
ونبص لبعض ونستغرب
من التجاعيد المنقوشة
علي وش مرايتى المغشوشه
كدا هنت عليكى تبيعينى
وتلونى حلمى بلون الشيب ؟
وأنا لسه يدوب بدئه افتح
أول ورداية ف تكعبتى
والصوره باهته ومكسورة
وتاريخ الحدوته إتهلهل
وشرخ لئيم جوه ضلوعى
يدفن جواه أحلام ياما
وأحزان محفورة بعيونى
تصنع أخاديد
وأنا والحواديت ياما حلمنا
ودارينا أمالنا فى بحر الشوق
تشاركنا القصه في طريقي
جوه الزحمه الفرح يفوق
يسرقنا الوقت ونتناسا
إننا أرواح ومشتاقه
لضمة أنفاس
نلضم خيطنا بطرف القمره
ونتمنى نروح لعيون بكره
يمكن ترضي
ونشد الحلم اللى رافضنا
نلبس فستانها المتلون بعدالغربه
ونفضل واقفين علي باب الصدفه
نستنى يوم تجمعنا بحرف ومعنى
وتضحك لي مرايتى المكسورة
تجمعنى بأجزاء الصورة جوه البرواز
علي رصيف الأخيلة نرسم أحلام
وشط الهزيان يسرق طفولتنا جوانا
ويرد جواب الأسئلة جوه الخانه
أضغاث أحلام … طعم الحرمان
وحدوته قديمه في البرواز
أحزانها إزاز ومتفرفت
وإطار مغزول قصاقيص من دمع العشاق
إستنوا زمان القطر يفوت
وماتوا من كتر الأشواق

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى