https://hamsamagazine.com/%d9%82%d8%b5%d9%8a%d8%af%d8%a9-%d9%86%d8%b5-%d8%b6%d8%ad%d9%83%d8%a9-%d9%85%d8%b3%d8%a7%d8%a8%d9%82%d8%a9-%d8%a7%d9%84%d8%b4%d8%b9%d8%b1-%d8%a7%d9%84%d8%b9%d8%a7%d9%85%d9%8a-%d8%a8%d9%82%d9%84/

تم النشر

أم فاطمه

فاطمه يااا بنت قلبي
ايوه يا امّه عايزه ايه
امسكـي ال ٢٠ ج
واوصلي عمك نبيه
اللي دكانتُه في آخر
شارع الزمن الجميل

اشتري ٢ كيلو سمنه وربع
حنه وكيس زيتون
علبتين تونه وسالمون
كيلو زيت وعودين بخور
مشط كبريت ويا إبره و
خيط وابره للبابور
قمع سكر م القوالب
تذكرة شاي م الكبير
م اللى ينطح فى النافوخ
اوعي تنسي تجيبي منه
علبتين جبنه ومعاهم
ملح ناعم م النضيف
باكو او كام باكو شطه
بس فيه حرقان قليل

واشتريلك كيس حلاوه و
لب وسوداني ولبان
واشتري كل اللي نفسك
فيه يا فاطمه مهما كان
واشترى لأختك كمان
واسأليها بارضه جايز
عايزه أيه ثاني تجيبيه
واسألى المحروس أخوكى
لجل ما يجوش ويلموكى
انتى ليه ما بتسأليش
مهما كان باردك خِواتِك
ليّا مين غيركم مافيش

من عينيا يا امّه حاضر
إطمئنى ما تخافيش
كل حاجه جوًه راسى
يعنى منى ما تقلاقيش
أيه يا بنتي استنى لسًه
الدنيا طارت واللا أيه
وانتى ماشيه وف طريقك
عمك الحاج ابراهيم
عاوزه بطه تكون كبيره
وادبحيها ونظفيها
خلى عينِك وسط راسِك
إوعى م الفطيس يا بت
وانتى بالمرًه يا فاطمه
عدي على عمِّك غنيم
هاتي منــُّه رطل لحمه و
جوز كوارع بس أيه
اصل ابوكي نفسه فيها
قال عليها من يومين
واوعي تنسي تكسّريهُم
والله خايفه لا تسيبيهُم
تيجي من غير ما تجيبيهُم

وانت فايته ع الحسينى
الى له دُكان عطاره
اشتري منه التوابل
كامله يا عاقله وشطاره
عرق سوس لو كان كويس
جيبي منه نص كيلو
تمر هندي وسوبيا بيضه
لو لاقيتى عنده هاتى
إدعى رب يخلى ابوكم
يرزقه بالخير يوماتى
والله من غير خير أبوكم
بعد ربك كان يا ويلنا
فى الحياه نفضل نهاتى
وف عيشتنا نموت بجوعنا
ربنا يجبر بخاطره
والفرج يبقى ملازمنا

كوكوكوكو الديك بيدن
فاطمه قامت من سريرها
إصحى يا امه الفجر عدًى
والصلاه جابت آخرها
أم فاطمه فجأه فاقت
بعد ما طار منها نومها
أيه يا بنتى
خير كف الله الشر مالك
إحنا فين
هو ده حلم وحلمته
واللا نوم الجوعانين
اللى طاطوا للديابه
لمّا صاروا مصعورين
روحى يللا وصحًى اخوكى
لجل مايجيب الفطار
ياخد ال ٢٠ جنيه
يشترى كيس فول صغيًر
ويًا طعميْـتين صغار
غمًسوا اللقمه بريحيتهم
ماحنا خمسه و مش كتار
ربنا يجازى اللى خللى
الحياه سوده ومرار
…………
بقلمى / الشاعر السيد خطاب