آخر قصيدة
**********
آخر قصيدة ف السنة
للسوسنة
أم العيون الساهرة
على شط نهر القاهرة
مستنظرة
شمس النهار تطرح هَنا
وتقول لنا
آن الأوان
نكتب تاريخنا بنفسنا
ف سطور كتاب شاف الشباب
تحت العلم
ماسكة القلم
وبترسم النور والأمل
والقمحة بتبوس السَبل
وتفكره
بجهود جدودنا ومجدنا
آخر قصيدة ف السنة
للسوسنة
أم الجنود حامية الحدود
والأزمنة
فوق كٍتفها شايلة السلاح
وف كَفها نور الصباح
اللى ابتدى يطرح هُدى
يخرس جميع الألسنة
ويهد سور الأكمنة
ويقول لنا
آن الأوان نحمى الوطن
من حٍقد أسَراب الفتن
ونشيل ترابه ف حضننا
آن الأوان
نروى الرمال من دمنا
آخر قصيدة ف السنة
للسوسنة
أم الحسين والسيدة
أم المقطم والهرم
يمكن ننول منها الرضا
وتفيض علينا بالكرم
ويكفى خيرها شعبنا
يمكن يشوفها قلبنا
بتمد ايدها الطيبة
للفلاحين ع المصطبة
والشقيانين ع السقالات
من كام سنة
وتقول لهم وتقول لنا
آن الأوان
نحصد نتيجة صبرنا
********************
رضا أبو الغيط
