عديت على حيكم
ونضرت بستاني
بيغني لحن جميل
وبصوته أشجاني
ياعود ريحان الهوى
هات الحبيب تاني
جففت دمع العين
طرحت دموع تاني
مديت جذور الوصل
قطَّعتو شرياني
رميت شباك الهوى
طلع الشبك فاضي
قلبي اللي عاش حُبكم
وبظلمكم راضي
من بعد طول هجركم
نسي اللي كان منكم
والحب صار ماضي
طفيت شموع روحي
وكتبت لك سطرين
قلبي اللي كان ليك دوا.
مقسوم مابين إتنين
واحد ضناه الهوى
والتاني بين البين
البخت ساب سكته
يابختي رايح فين؟!
الناس خيبتها الحد
وانا خيبتي ليه حدين؟
يابختي قلبك حجر
تعشق دموع العين
ياناس أسير الهوى
واللي كاويني فين
خطيت بحور وبحور
وتوهت بين شطين
وركبت ريح البحر
لجل أعدل المايل
مالت قلوع مركبي
زاد الوجع وجعين
قرب الحبايب دوا
ليه الفراق مكتوب؟!
علقم ياطعم الوجع
والصبر أجيبه منين؟
#فاطمة علام#
