الاسم: عمر اسامة رضا ابراهيم
الشهرة: عمر رضا
البلد : مصر /محافظة الجيزة مدينة ٦ اكتوبر
الفئة:شعر العامية
اسم القصيدة: ابويا
ابويا
السنين عدت يابويا
و انت حقك دين عليا
كل ما اكتب سطر عنك
القلم بيسيب ايديا
اصل صعب اكتب ف سيرتك
برضه سيرتك مش شويه
السنين عدت يابويا
و المشاكل و المدارس و التعب و الهم فات
عشت جمبه العمر كله خدت منه
كتير حاجات
زي مثلآ
كرمه جدآ
زي قومته لصلاه اول ما تدن
زي صوته او كلامه
زي مثلآ نظرته
و ضحكه ف سلامه
خدت منك كل حاجة يا عزيزي
الا نطق الانجليزي
خدت مثلآ قلب ثابت
يجري ناحية اي حاجة
تقول يا حق
المشاغل تاخده منك وقت فرحه
بس وقت الشدة لا
قالي عيش الدنياا راجل
حتى لو مالت عليك
كملها زق
اب علمني الكرامة
و الأمانة
و السلام
اب لما اكتب عشانه
كل حاجة تقوم تقف
حتى الكلام
اب علمني ابقى عادل
لأجل يوم ما احط راسي على المخدة
اوام انام
اب عشت ف بيته
جاهل يعني ايه معنى الالام
لما هكتب عن ابويا
هكتب انت ملوش مثيل
و الجميل ف الدنيا هوا
و غيره هوا مش جميل
اب ماشي بحسن سيرته
اب بفخر طول حياتي بسكته
و نجاح مسيرته
اب خدني م البداية
و حطني ف أحسن مسار
اب بعد ٢٠٠ سنة
هتلاقو اسمه ف المتاحف و المعابد
جمب اسماء الآثار
اب وقت الجد هيبة
و تلقو دايمآ افيهاتو
حاضرة اوقات الهزار
اب علمني النجاح له باب وحيد
و النجاح مش بس مرة
النجاح يخلص نجاح لنجاح جديد
هكتب ايه عن اب خلي كل ايام بيتنا عيد
هكتب ايه عن شخص ناجح بأكتساح
هكتب ايه عن شخص فاقة قصته كلمة نجاح
او حتى هقدر اوفي حقه ازاي
وصلت لدرجة لما بنروح الهرم
بنلاقي خوفو بيندهو
و يقولو خش تعالي نشرب شاي
خوفو الي يتمنو البشر
يجو يشوفوه انشاله من براه
م انا ابويا الأول ف مجاله و الباقي وراه
و انا بدعيله
ربي يزيدو
و يخليه
و يديم الفرحة كمان ف عنيه
و يطول عمره و ايامه
و ده دايمآ مطلبي و رجائي
معرفش ليه كل اما تيجي سيرة ابويا
بلقاني رافع راسي تلقائي
في النهاية
بشهد اني
طول ما جزمة ابويا على عتب
البيبان
قلبي حاسس
ب الأمان
و ان ابويا المأوى
و البيت و المكان
و ان عاش دايمآ معاانا
و انه مهما عملنا برضه قال فداانا
و ان عاش واهب حياتي و دنيتي و أيامه لينا
و ان خوف الدنيا ميجيش حاجة
ابدآ جمب خووف
قلبه علينا
و اننا عشنا الحياة مطمنين بوجوده وسطينا
و ان ف يوم نطلب عيونه مكنش يتأخر كمان
يكفي ان وجوده احساس ب الأمان
زي الجيوش واقف يطمن قلبنا
زي الجدار ساندين عليه
و هو واقف لاجلنا بقوة و صلابة
ربنا يخليك يا بابا
