ــــــــــــــــ أدان اللقا ـــــــــــــــــ
إنتوا اللي سيبتوا اليأس يتغندر
بينك وبينه ويبعد المسافات
وليه تسيبوا العقل يتحير
والرحله عايزه الصبر ع الهفوات
عايزه القلوب المؤمنه تسامح
تكسر نياب الغل وتهديه
تضحك سنين العمر وتطيب الملامح
تنسوا العيوب المؤذيه وطعن الجروح
تمشوا الخطاوي ع السكك
قلبين ف روح
وتلقوا ع الجنبين ورود
ياسمين وفل / ريحان وعود
وتتحقق وعود
والقلب تاني يعود حنون
كل تفاصيلك حافظها بجنون
في كل ركن بتترسم وتنزف الأشواق
وتسيبوا للذكرى أجمل قصة للعشاق
واللقطه واحده في كل شوت
الحب فيها أجمل الأشياء
وتفيض مشاعركم سوا
بين الفرح / والإنتشاء
وتدوب دواعي الفرقه
ويزول الأنين
وتعود سنين الفرح
وتحاوط قلوبكوا العطشانين
بدون أسئله / وازاي وليه
تلقوا الأمان / والسعد بان
وكل شيئ كان بينكوا ميت
هايعود كما الاول نضر
يجي السحاب يرمي المطر
يروي شراقي العمر
تلقوا إحساسكم عطر
من غير غطا
هاتبان نواياكم جليه
ترحل ظنون
بتهد في عشوشكوا وغبيه
هاتعودوا من بعد الغياب
وتنادوا على كل الورود
تهدموا كل السدود
وتقيموا للأفراح منابر
جوا روحكوا وزينوها
وتقروا آيات الحب وتحفظوها
والعيون تهوى العيون
والإيدين متشبكين واوعوا تسيبوه
