أصعب قرار
*************
مستني ايه بعد اللي صار
والإنكسار
وأنين حزين واقف وحيد
وسط الحصار
دى النار بتنهش ف البشر
والطفل مش لاقي الحجر
والريح.. بتعوى.. ف الخلا
والولوله……. من دار لدار
مستني ايه
بعد الأمال ..ما اتحطمت
واستسلمت
لليأس …..ودموع الوجع
فوق صخرة الخوف اللعين
وبقايا حلمي اللي انحنى
داخل حدود المنحني
لحظة ماسار عكس المسار
مستنى ايه
من ديب بينهش ف الغنم
تحت الهرم
من ديب ماهمه م الحرس
ولا حتي همه من نِدا
صوت المآذن والجرس
وتملى داير ف البلد
يخنق بإيده اللي اتولد
ويمص فى دم الصغار
مستني ايه
من ليل بياكل ف النهار
بإسم الدولار
ويحلى
بالحلم اللى قرب يندفن
تحت الجدار
مع كل ناسى المرغمه
تشرب مرار
من بير عوار صمت الأمم
وقرار بيتحدى القرار
مستني ايه
والرسم البياني للأمل
فى أطلسى
من مده فى حالة انحدار
والزرع من كتر العطش
دبلت عروقه وابتدى
ينسى عنواين الخَضار
مستنى إيه
يا بكره لجل ما تتخذ
أجرئ قرار
المسأله مش معضله
وللا هي حابه ينعقد
ليها اجتماع
وكام بتاع
يخرج يسمم فكرنا
بكلام صداع
ولجان هدفها المركبه
تنسى الشراع
المشكله
مش مشكلة عشق وغرام
وللا هى وصف لمسألة
حِل وحرام
المشكله
مين فينا قادر يتخذ
أصعب قرار
أو مين يهمه السوسنه
تطرح نهار
*******************
رضا ابو الغيط
