أمن قومي
*******
يا حبيبتي
ضُمي قلبي ليكي ضُمي
وانسي همك وانسي همي
وابدري بالفرح قلبك
واكتبي اسمك بدمي
يا حبيبتي
صدقيني
لما أقولك إنتي عيني
والجمال إللي ف سنيني
وإن حبك جوه قلبي
أمن قومي
ياحبيبتي
مش هبالغ لما أقولك
عودك المفتول بصبرك
والكلام إللي ف صمتك
أمن قومي
يا حياتي
صدقيني لما أقولك
نيلك الطارح ملامحك
والغيطان الطارحة قمحك
والحنان إللي ف صبحك
دم إبنك
ضي شمسك
بدرك العاشق لهمسك
أمن قومي
ياحبيبتي
يلا هٍمي
وامسحي بإيديكي همي
واللي هيفكر يقرب
من حروف اسمك يا امي
راح يلاقي خط احمر
مش هيرحم أو يسمي
ع إللي حاول
يقطف الورد إللي طارح
فوق خدودك
وإللي فكر يوم يغًير
لون ملامحك أو حدودك
راح يلاقي خط احمر
مش هيرحم أو يسمي
ع إللي نفسه مرة يلمح
دمعة نازلة من عيونك
وف عيونك يقرأ همي
يا حبيبتي
مش ببالغ لما أقولك
إن وردك وإن فلك
خط أحمر
وان شمسك وان ضلك
خط أحمر
وإن اجراس الكنايس
والمصانع والمدارس
خط أحمر
وان أصوات الجوامع
واللي ساجد وإللي راكع
خط أحمر
وإن حبك جوه قلبي
أمن قومي
***
***
***
**
رضا أبو الغيط
