((أمي))
قالوا شهر مارس عيدك
قلت كل ثانية كانت عيدك
بس انت فين وانا يا امه
من عمري يا عمري اديلك
تعالي صحيني لمدرستي
وقولي الشمس طلعت
اقولك لسه بدري يا أمه
تقولي انت عارف الساعة كام؟
اقولك سبعة لسه بدري!
تقولي يدوبك علي الطابور تمام
*******
لملمي يا امه جروحي
وكفكفي بيدك دموعي
ولو غمضت يوم عيني
دمعتي تفرقع ضلوعي
واحشني حضنك يا أمه
خديني واقبريني جنبك خديني
فاكره يا أمه لما كنتي تدعيلي
مفيش حد دلوقتى يواسيني
******
وحشاني يا امه وواحشني كلامك
واحشني صوتك طيبتك همسك سلامك
لملميني يا امه بكفوفك
وخديني في حجرك نفسي اشوفك
وآه يا أمه آه
غطي وشي بطرف الطرحه
رجعيلي بسمتي ويا الفرحة
بصي على وشي وأنا نايم علي رجلك
قولي مالك ياولدي ايه حصلك
كنت سعيد والفرحة دايما عندك
وبصوت الضحكة تجلجل وترسم وشك
*****
طيبتك حنيتك يا أمه لقيتهم في بنتي
بقولها حنينه يا بنتي
قالت ابدا مش زي حنية ستي
اتوحشك أتطلع ليها
يمكن ياأمه ساكنه عينيها
*******
لملميني يا امه ولملمي جروحي
انت سكني ومأمني بعد خوفي
***”*
وآه يا امه آه من فراقك
نفسي امسح دموعي في شالك
وكفك النادي يمسح خدودي
مابقالي غير صورتك وعكازك
بقلم ابنك/شحات بلال الرفاعي
