أنا الطاير بدون جناحين
فى دنيا العشق والأوهام
تملى ف قلبى جرح سنين
لكنى بأعافر الأيام
طويت الحلم بين ضلعين
وع القسمة بأقوم وبأنام
لا انا طالب أشيل ملايين
ولا حابب أكون رحال
ونفسى ف حضن كله حنين
وأعيش علطول فى راحة بال
رميت همى على بلادى
ولو شمسى تغيب عادى
بأغنيلها فى ضيق الحال
وبأعزف صبرى طاقة نور
وبأبنى ليأسى ٢٠٠٠ سور
وأسطر فرحى ف الموال
على جبينى الامل مرسوم
ورود طرحت بشوق وحنان
فى نورها ماشى بأتعكز
ولو دايق سنين حرمان
مدام الهم مش جابر
ولا شافع ولا ساتر
فاليه تنزل دموع إنسان
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
