أنا حلمي بسيط يا جماعه
شغال رسام بالساعه
ورسمت كتير عالحيطان
برسم في وشوش فرحانه
الوش بيضحك وحزين
واتاري قلبي مسكين
مرسوم عالحيطه متقطع
أصلي رسمته وأنا ببكي
مخدتش بالي انه قلبي
بصيت في الوش إللي بيضحك
وحزين ياناس على نفسي
وأنا ماشي في يوم بصيت
لقيت الصوره إللي راسمها
بتوصف واحد يشبهني
غصبا عني وانا برسم
تقلت فى اللون الأحمر
اتاريه كان جرح اللى في قلبي
ونزفه مغرق ألواني
فجاه لقيتني وأنا برسم
إني دموعي غالباني
خلصت نزيف ياجروحي
ولا ارسم عالحيط من تاني
أرسم قلبي الواحداني
أو ضحكة تكون بهتانه
أو ظلم وشقا وإهانه
وهم الدنيا إللي أذانا
وناس على لقمه شقيانة
أرسم طفل حزين وجعان
وقلب من الأحزان شبعان
برسم حلو أنا ياجماعه
أصلي رسام بالساعة
والاجر ضعيف ياجماعه
عايشين كلنا في مجاعه
كان حلمي أبقي رسام
ومكونشي في يوم منهان
أنا حلمي بسيط يا جماعه
شغال رسام بالساعه
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
