احمد محمد زايد
جمهورية مصر العربيه
الدلجمون مركز كفر الزيات غربيه
اسم الشهره / احمد زايد
01229982872
نوع المشاركه قصيده شعر عامى
( انا شوفتهم )
انا شوفتهم … اى شوفتهم
وعرفتهم وكشفتهم
وماغابش عنى غدرهم
مع انهم متلتمين
مع انهم من غير وشوش
ولهم عيون فى ضهرهم بتبخ سم
والحناجر بالخناجر مليانين
اشى فى الشمال واشى فى اليمين
وعلى الجبين بصمات كفوف
تحت السيوف المرشوقين فى الحلق
والخلق واقفه بعيد م الضفتين
والنهر جفت ميته
ولا عادش فيه غير دم م الفيضان
وسفينه بلا قبطان بتمشى عكس الريح
والوقت موش وقت الهذار
ولا حتى وقت الجد
واخبط دماغك فى الجدار
مش راح يجيلك رد
كل اللى كان محظور مباح
ولاحد شايف حد
والورد فى البستان بيشكى من العطش
والدمع سايل م العيون للخد
وبيشتلوا الوجع اللى بايت ع السكك
ويوزعوه ع اللى حضر وعلى اللى غاب
وكل واحد له مناب
وكل فك بالف ناب
والليل بيشتى الضلمه ف عيون النهار
ونشج خيطانه العنكبوت على السكك وعلى البيوت
ولاعاد نفس ولا حتى صوت
ولاهمس نجمه من النجوم
ولاعود كبيت بيوزعوه عند اللزوم
والليل طويل يشبه مسيرة الف عام
والف بومه تغنى فوق برج الحمام
لما السلام تاه فى الزحام
ومالوش اثر
ومانعرفوش مات فى الحروب ولا اتاسر
كل اللى عارفينو انه راح ولاعادش جى
من يوم ماهبت عاصفه
ووقعت ورق الشجر من ع الغصون
والف ضحكه اتزحلقت من ع العيون
والف ضحكه اتزحلقت من ع العيون
وانا شوفتهم م الدلجمون وقليب بيار
واللىل بيرقص للمحار
لكنه موش قادر يغوص
ويواجه التجار
فمافيش لزوم للفزلكه والانتكه
ياللى اتداريت فى البوص
لانى شايفك ع الدوام بلبوص
وعايش فى جحر الصمت زى الفار
بقلم / احمد محمد زايد
