ساجد محمد عبد الفتاح
14 سنه
من مصر
فئة الشعر العامي
انا مبدع
و مهما قالو فيا كتير
و مهما قالو او عابو
و مهما كتبو في التقرير
انا مبدع
و هم عجزوا في التقدير
و قالو ان انا عاجز
و غالوا ياما فالتصوير
و فجأه.. طلعت انا الفايز
انا مبدع
انا زيك
لكني زيادة في ميزه
مولود ف قلبي انا غريزه
اتحدى بيها كل صعاب
و بهمه تتفتح الأبواب
وبلدى عليا دى عزيزة
كلمة اعاقه
يعني مانع
و عزيمتي تقول
و ايه المانع
اني احولها لقوه
و أوري العالم.. بره وجوه
و اخلي علمي فوق مرفوع
و اخلي صوتي انا مسموع
و أنور عتمتي بشموع
صحيح ياما بعيش آلام
و اشوف ف الدنيا دي ايام
تحزني.. تبكيني
تخلي الدمعه على عيني
تسيل انهار
لكن بالهمه و الإصرار
بعديها
و نبتة حلمي برويها
و بذرة أملي انميها
انا جوايا روح فنان
انا زيك ..انا إنسان
انا مبدع و انا اقدر
اعدي بحر لياليا
انا هعبر
و امشي ف شارع الفرحه
وافوح بالمسك و العنبر
و أشد ف عزمي و الاصرار
واقوم بدري اشق نهار
و اخلي الدنيا دي تحتار
بإني قادر اتخطى
حدود النار
دايما فايدى رافع شعار
انا كامل ما عندي نقص
واخلى بلدى دى عمار
انا عمري مابعرف يأس
اشيل الدنيا دي بدراع
واشرف بلدى بالابداع
و املى الدنيا دي بالورد
و امشي يهز صوتي الأرض
انا مبدع
انا مبدع
