قصيدة: أنا مش انانية .. مسابقة الشعر العامي .بقلم / ماجدة البهيدي

خاص بمهرجان همسه الدولي للأدب والفنون
الاسم / ماجدة البهيدي
البلد /جمهورية مصر العربية
قصيدة عامية

لينك الصفحة الشخصية

https://www.facebook.com/profile.php?id=100030617560845&mibextid=ZbWKwL

انا مش انانية
بقلم ماجدة البهيدي
،*************
لما تخاف على زعلي شوية
أو أطلب منك حنية
تيجي إزاي و تجرح فيا
وتقول ان دي حاجه عادية

دي مش انانية
لما بقولك أيه إللي جرالي
وإن الشوق سهرني ليالي
والدمع في عيني بيسألني
ليه ده حبيبي مداري بحالي

دي مش أنانية
لما الليل بيطول في غيابك
ويطير قلبي قوام على بابك
ترجع عادي تقول أعذار
وتلقى مشاعري دي ملك جنابك

دي مش أنانية
لو جيه يوم أحتاجك قلبي
أو حلفتك تفضل جمبي
بقى بالذمة علشان حبيتك
يبقى ده هو معقولة ذنبي

دي مش أنانية
إني بحبك حب عبادة
اكتر ما اتحبيت بزيادة
حب مشفتش زيه في عمرك
حبي أنا ليك مخصوص مش عادة

دي مش أنانية
إني أتلفت القيك جمبي
تبقى معايا كل حبايبي
و إن أعيش العمر ده ليك
وتبقى حياتنا بمبي ف بمبي

دي مش أنانية
إوعى عيونك ما تشوف خيري
و إياك ترمش كده من غيري
إوعى تقول إن أنا غيورة
بس بحاول أرضي ضميري

دي مش أنانية
لما بقوم وبنام على حبك
وكل شوية بقولها بحبك
وعايزة العالم كله ده يعرف
أنا مجنونه حقيقي بحبك