قصيدة ( أنا مين ) للشاعر / بكر بسيونى

________ ( أنا مين ) ________

_______

من غير ما عيونك تسألني

من غير ما يقولوا الناس عني

ح افتحلك قلبي و أحكيلك

و أجاوب بصراحه سؤالك

أنا ميييين … أنا إيه بالنسبالك ؟

أنا دمعه نايمه علي جفوني

من بعد سهرها ف عيوني

و ضحكه ع شفايف عطشانه

بتمني يرويني حنانك

أنا نجمه ف السما سهرانه

يا هاجرني و ف القرب ناسيني

و بتسأل من غير ما تجيني

أنا ميييين … أنا إيه بالنسبالك !!

أنا قلب بيرقص لو شافك

و بيبكي لو حس غيابك

و عيون من شوقها بتندهلك

سهرانه دايما علي بابك

و يا ريتك بتحس بقلبي

و بعيني إللي ظلمها غيابك

و لسه بتسأل يا حبيبي

أنا ميييين … أنا إيه بالنسبالك !!

يا حبيبي ليه بس بتسأل

دي عيونك لو جات ف عيوني

ح توفر يا حبيبي سؤالك

و ح تعرف من غير ما أقولك

أنا مييييين … أنا إيه بالنسبالك

من ديوان / مواويل مصرية

بكر بسيوني