أنا والحب
………..
عشقتك قبل ما اعشقني
وشوفتك قبل ما المحني
وقبلك كنت ع الهامش
خيال عايش
وشئ محني
طلع ضِلّك ومرجحني
ما بين الضي والجنّه
يا ضحكة عمر خلّتني
بكل العمر أتهنّى
واعيش أيامي أتمنّى
أوضّي عيوني من صورتك
واضمك ضمّه جوايا
يا قِصّه بدأتها بيكي
ومش عاوز لها نهايه
عشان ح افردها يا حبيبتي
حكايه وبعدها حكايه
وكل حكايه تبقي انتي
وانا والحب ويّايا
يا شمس ف إيدها ضلايه
تدفيني ف وقت البرد
تخبّيني ف وقت الصهد
وتفردلي الضيا مواويل
ياليل عاشق عيونها بجد
ولو عُقد الغرام يتعد
ح اعد لأخر الأعداد
ومش ح اوصل مدى الإحساس
ولا ح اوصل لربع الشوق
كفايه الفاكهه فوق عودها
أبسمل ألف مرّه وادوق
ولمّا الليل يقرّبلي
أبص ف عينها ييجي شروق
أقوم اتوضا وأصلّي
قصاد عينها ف أوّل ضوء
ولو غابت أبات مخنوق
واحس التوهه والعتمه
واحس الليل
حبيبتي ضحكة القنديل
تنوّرلي الحياه ألوان
مكانها أكيد ف قلب القلب
حروفها بتجري ف الشريان
ولو قلبي اتخلق إنسان
حبيبتي ..
حوريه م الجنه
………………………………………
محمد ابو العبادى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
